Hatutan.com, (22 Fevereiru 2024), Díli– Reprezentante povu iha Parlamentu Nasionál liuhosi Bankada n FRETILIN husu Governu kriá uluk kondizaun molok muda vendedór obralan Ai-mutin.
Lee Mós: Vendedór Ambulante Faan iha Estrada Ninin Tanba La Hetan Fatin iha Merkadu
“Bankada opozisaun nia pozisaun apoiu programa ne’ebé maka Sekretáriu Estadu Asuntu Toponomia Urbanizasaun (SEATOU) halo tanba ne’e bazeia bá lei. Agora kestaun maka ne’e ita atu muda ita-nia vendedór sira; primeiru kondisaun kriá uluk atu oinsá ita-nia vendedór roupa obralan sira atu kontinua buka sira-nia moris,” membru PN hosi Bankada FRETILIN, António Moniz Clau hateten bá jornalista sira iha PN, Kinta (22/02/2024).
Governu sobu ona baraka sira ne’ebé durante vendedór sira utiliza hodi fa’an roupa obralan iha Ai-mutin, Díli. Foto/foti hosi Konta Facebook Elm Carvalho
Tuir nia haree atividade negósiu roupa obralan nia estrada ninin Ai-mutin nian perturba duni orden públiku no sira harii sira-nia baraka iha keda valeta leten, maibé haree hosi aspetu ekonomia uma laran, atividade negósiu ida-ne’e fó rendimentu natoon bá sira-nia nesesidade uma-laran. Tanba ne’e presiza konsidera atu la bele halo povu ki’ik terus iha ekonomia Timor-Leste nian ida susar babeibeik ne’e.
Deputadu António Moniz Clau husu bá SEATOU atu identifiká fatin ne’ebé dignu no fatin ne’ebé merese bá vendedór roupa obralan sira iha Ai-mutin hodi garantia katak sira nafatin buka sira nia moris no labele hapara sira nia atividade faan roupa obralan.
Iha parte seluk deputada bankada CNRT Patrocinio Fernandes haktuir tanba udan ema hotu preokupa inundasaun, lixu no fatin book aan ladi’ak, tanba ne’e maka SEATOU muda vendedór hirak ne’e.
“Ita komprende ita-nia sidadaun buka osan, maibé tenke mós iha responsabilidade nu’udár sidadaun, ita preokupa hotu bá situasaun públiku nian, ne’ebé estadu Governu tenke iha duni autoridade atu organiza nia sidadaun sira no organiza fatin sira ne’e,” Deputadu Patrocinio Fernandes hateten.
Nia haktuir nu’udár reprezentante povu fiar katak Governu sei la husik nia povu hodi hasoru problema no fiar katak Governu sei buka alternativa seluk hodi rezolve bá preokupasaun povu nian.
Jornalista Estajiária: Zita Menezes