Hatutan.com, (06 Marsu 2024), Díli—Reinu Tailándia iha kompromisu bo’ot atu apoia dezenvolvimentu Timor-Leste (TL) nian iha área edukasaun, agrikultura inklui meiu ambiente modernu ne’ebé bele lori benefísiu ekonómiku ba povu iha país ne’e.

Ministru Prezidénsia Konsellu Ministru (PCM), Agio Pereira.

Deklarasaun ne’e hato’o husi Embaixadór Reinu Tailándia, Atipat Rojanapaibulya, hafoin aprezenta karta kredensiál bá Prezidente Repúblika, José Ramos-Horta iha Palásiu Prezidensiál Nicolau Lobato Bairru-Pité, Kuarta (06/03/2024).

Lee Mós: Aspetu Profisionál no Família, Lukeno Alkatiri La Sai Embaixadór TL bá Tailándia

Ministru Prezidensia Konsellu Ministru (PCM) ho Ministru Negósius Estranjeirus no Kooperasaun (MNEK) Interinu, Agio Pereira hateten, Embaixadór foun Reinu Tailándia nian entrega kredensiál bá Prezidente Repúblika, José Ramos-Horta, hanesan bai-bain embaixadór sira kuandu foun, lori sira nia kredensiál mai atu hatudu katak hahú servisu ona iha Timor-Leste.

“Embaixadór mos iha ideias no planu atu halo no kumpri dezenvolvimentu Timor-Leste nian ho kooperasaun hosi Tailándia foka iha área bar-barak hanesan edukasaun, agrikultura, meiu ambiente  ne’ebé ohin loron modern,” Agio Pereira hateten.

Governante ne’e hatutan, iha embaixadór Tailándia nia mandatu ne’e sei koopera ho Governu no Prezidensia Repúblika atu reforsa relasaun entre Estadu rua.

Molok aprezenta karta kredensiál bá Prezidente Repúblika, embaixadír-dezignadu Tailándia bá Timor-Leste, hala’o ona sorumutu kortezia ho embaixadór sira nasaun Sudeste Aziatiku iha Timor-Leste hodi troka hanoin kona-bá situasaun polítika Timor-Leste nian, dezenvolvimentu ekonómiku no dezafiu sosiál sira agora no iha futuru.

Jornalista: Vito Salvadór