Hatutan.com, (13 Marsu 2024), Díli—Igreja Katólika nafatin hola papél importante hodi tulun dezenvolvimentu seitór edukasaun no apoiu atividade sosiál sira iha Timor-Leste (TL).

Mgr, Marco Sprizzi. Foto/Elio dos Santos da Costa.

Reprezentante Santa Sé mai Timor-Leste, Mgr. Marco Sprizzi hato’o asuntu ne’e hafoin hasoru-malu ho Prezidente Repúblika, José Ramos-Horta iha Palásiu Prezidensiál Nicolau Lobato Bairr-Pité, Kuarta (13/03/2024).

Lee Mós: IX Governu Aloka Millaun $15 bá Igreja Katólika Atu Dezenvolve Área Tolu

“Igreja ho Estadu sempre iha programa bá povu Timor Leste. Tanba ne’e, presiza atu implementa kolaborasaun entre parte rua iha área edukasaun no saúde ne’ebé importante tebes ba povu ida-ne’e,  liga ho alokasaun rekusu tuir akordu ne’ebé Igreja no Estadu iha ho finansiamentu Estadu nian liu hosi subsidiu ba Conferênsia Episcopal Timorense iha área edukasaun, sosiál no servisu seluk ne’ebé benefisia povu,” Reprezentante Santa-Sé esplika.

Relasióna ho apoiu ka subsidiu hosi Estadu ba Uma Kreda, nia dehan, Igreja iha responsablidade bá ezekusaun no sei hato’o relatóriu finanseiru ida transparente bá kada projetu tanba ne’e osan povu nian no Igreja iha responsablidade atu utiliza ba bem komún povu nian.

Estadu ho Igreja  iha Preparasaun Avansada bá Vizita Papa Francisco

Sorumutu ohin mós nu’udár enkontru amizade ne’ebé sempre halo ho Prezidente Repúblika, José Ramos-Horta hodi atualiza situasaun sira relasiona ho preparasaun Timor bá vizita Papa Francisco nian mai Timor Leste.

“Oras-ne’e daudaun preparasaun sira iha ona faze avansadu. Tanba ne’e, sempre iha reuniaun sira nune’e atu troka informasaun importante sira ho Xefe Estadu hodi atualiza nafatin,” Mgr. Marco Sprizzi hateten.

Nia informa katak, laiha novidade foun ka espesiál ruma ne’ebé komunika ba malu kona-bá vizita Papa Francisco nian, maibé ida-ne’e hanesan de’it biban balun atu parte rua  fahe informasaun no ideia kona-bá lala’ok no servisu hamutuk entre Igreja no Estadu.

“Ohin ami ko’alia mós kona-ba panorama ba vizita Santu Padre ninian, rona mós informasaun kona-ba orsamentu ne’ebé governu aloka ba preparasaun ne’e,” nia dehan.

To’o agora nia mós seidauk bele ko’alia kona-bá data fisksu bá vizita Santu Padre mai Timor Leste, tanba bele muda ho razaun balun ne’ebé la espera tanba ne’e kontinua servisu hodi hein loron ne’ebé Santu Padre mai vizita Timor Leste.

Jornalista: Vito Salvadór