Hatutan.com, (18 Marsu 2024), Díli—Bankada FRETILIN husu Governu no Parlamentu Nasionál (PN) atu halo uluk altersaun bá Lei Comissão Anti Corrupção (CAC) hafoin bele hakat bá eleisaun komissáriu foun.

Xefe bankada FRETILIN, deputadu Aniceto Guterres Lopes hateten bankada boot rua CNRT ho FRETILIN iha Parlamentu Nasionál iha ona konkordánsia bá prossesu eleisaun komisáriu CAC nian, maibé FRETILIN prefere halo uluk alterasaun bá Lei.

Lee Mós: Líder Bankada Sira Promete-tán Halo Eleisaun bá Komissáriu CAC iha 19 Marsu

“Loos duni ami iha ona konkordánsia. Atu dehan loloos katak, konsensu ne’e iha tiha ona maibé tanba ami rona informasaun ikus no ha’u rona direta hosi Vise-Ministru Asuntu Parlamentá, Adérito da Costa Hugo deklara iha konferénsia líder bankada nian iha semana ida liu bá hodi hatan bá pergunta deputadu ida nian katak, Governu agora prepara hela atu halo alterasaun bá Lei kriasaun CAC,” Aniceto Guterres Lopes hateten liu hosi konferénsia imprensa iha bankada FRETILIN PN, Segunda (18/03/2024).

Alterasaun ne’e, nia dehan, iha pontu interesante liu maka kona-bá papél ka funsaun CAC iha prevensaun no kombate korrupsaun, durante papél rua CAC ninian maka prevensaun no kombate korrupsaun.

“Alterasaun ne’ebé Governu hanoin hela atu haree maka funsaun rua ne’e sei mantein hotu iha CAC ka hela de’it ho funsaun ida de’it maka funsaun prevensaun de’it ka funsaun kombate de’it,” nia hateten.

Tanba ne’e, nia hatutan pontu rua ne’e importante tebes bá desizaun atu hili komisáriu liga bá komisáriu tenki hatene katak, sé hanesan ne’e nafatin ou iha tiha ona mudansa, ne’e mós determina kualidade figura  ka rekezitu oin-oin kona-bá komisáriu ida iha tempu oin mai.

Bankada FRETILIN hanoin katak, dalan di’ak liu maka halo uluk altersaun bá Lei CAC nian hafoin bele avansa bá eleisaun nian.

“Atu hateten katak, ne’e forma ida atu kontribui bá prossesu ida hili komisáriu ne’e, la’ós atu blokeia maibé ami haree dalan ida di’ak liu maka ita altera uluk Lei atu ita bele define klaru kedan papél no funsaun CAC ninian mak ita haree fila-fali kandidatu ka kontinua nafatin ho ida ne’ebé agora ami konsensu ona depois ita avansa bá eleisaun,” nia hateten tán.

Nune’e, bankada FRETILIN sujere bá bankada CNRT ho Governu atu iha tempu badak  bele hahú halo prossesu kona-bá alterasaun bá Lei CAC nian nune’e bele forte liután no di’ak liután iha tempu oin mai hodi luta hasoru korrupsaun iha nasaun ne’e.

Iha fatin hanesan Vise-Ministru Asuntu Parlamentár, Adérito da Costa Hugo hatán katak, Governu  iha korrespondénsia desde 2023 tanba kargu ne’e mamuk hela, desde VIII Governu, entaun IX Governu mai  inisía hala’o servisu iha 120 dias no asuntu ida maka atu prienxe fatin mamuk ida-ne’e.

Tanba ne’e maka nia dehan, primeiru korrespondénsia submete mai PN la konsegé iha konsénsu atu ajenda bá primeiru lista.

“Depois ami akompaña nafatin to’o iha Janeiru Fevereiru laiha nafatin korrespondénsia, tanba ne’e ami hatama segundu korrespondénsia ho kandidatu úniku no akompaña bankada sira kontinua loby no sé labele duni ona ami sei rona no buka opsaun sira seluk,” nia hateten.

Parte Governu seidauk to’o iha nivél ida atu halo alterasaun bá Lei CAC tanba respeita Parlamentu Nasionál nu’udár órgaun soberanu ida.

“Ami sei respeita nafatin Parlamentu Nasionál hanesan órgaun soberanu ida, respeita nafatin kontaktu sira bankada sira halo espesialmente bankada FRETILIN ho CNRT, depois to’o iha konsénsu ida sira bele ajenda ona bá eleisaun komisáriu CAC ne’ebé ami submete ona,” nia haktuir.

Jornalista Estajiária: Zita Menezes