Hatutan.com, (20 Marsu 2024), Díli—Kandidatu profesór 13.021 ne’ebe tuir teste elektróniku hosi inisiu to’o ohin loron la’o normál no iha kandidatu balun mak la partisipa ka falta maibé laiha justifikasaun bá ekipa juri.

Kandidatu profesór 13.021 ne’ebe tuir teste elektróniku iha edifisiu Comissão Função Publica, Kuarta (20/03/2024). Foto: Elio dos Santos da Costa.

Teste elektróniku bá bolsa kandidatura profesór sira hahú hosi loron 15 marsu 2024 to’o ohin loron sei finaliza iha loron 16 abril 2024.

Lee Mós: Kandidatu Profesór 13,021 Partisipa Ezame iha CFP

“Lorloron kuaze iha na’in 10 to’o 20 mak la mai. Ami la hatene tanba la iha justifikasaun tanba saida mak la mai. Ami fó-sai lista kandidatu ho oráriu teste iha munisipiu idak-idak, iha média sosiál inklui website Ministeriu Edukasaun nian ema barak asessu maibé ami la hatene kandidatu balun la mai ne’e laiha justifikasaun,” Prezidente Juri, Anita Tavares Ribeiro de Jesus hateten bá Hatutan.com iha edifisiu Comissão Função Publica, Kuarta (20/03/2024).

Advertisement

Anita Tavares Ribeiro de Jesus dehan, ida-ne’e konkursu publiku tanba ne’e, bainhira la mai maka ne’e ona no laiha tán alternativu seluk.

“Ohin  buat hotu-hotu la’o normal tanba kandidatu sira fokus duni no mós sira nia rezultadu bá prossesu ne’e rasik sira haree diretamente iha dashboard, katak konforme hosi sira mak sertifika duni sira nia an bá prossesu teste ne’e.

Prezidente Juri ne’e esplika, rezultadu teste ne’e sira assessu kedan iha ne’ebá saida mak sira halo ne’e nia valór sai kedan, sira haree ho matan rasik mak foin sira fila-fali bá ida-idak nia hela fatin.

Prezidente Juri, Anita Tavares Ribeiro de Jesus.

Teste eskrita bá bolsa kadidatura-1 bá pre-eskolar finaliza ona iha loron tolu liu bá no agora kontinua tama fali bá bolsa kadidatura-2 iha I no II siklu ninian.

Nia mós informa katak, to’o agora ekipa juri seidauk bele fó-sai kona-bá iha na’in hira mak liu no na’in hira mak la liu tanba prossesu teste ne’e agora se la’o hela.  Bainhira finaliza hotu tiha maka ekipa foin bele fó-sai rezultadu finál.

Perguntas iha teste ne’e hamutuk pontus 100 mak hanesan Lingua Tetun ho Portugés hanesan Lian ofisiál Timor Leste nian ho durasaun oras-2, nune’e bá padraun atu pasa, tuir Lei hateten katak, tenki kona pontus 60 mak foin bele pasa se la to’o ida-ne’e entaun la pasa.

Advertisement

Teste ne’e fahe tuir turnu, kada turnu akumula ema hamutuk na’in 160, nune’e iha loron ida ema na’in 640 kandidatus mak konklui teste no iha loron ida fahe ba turnu 4, dader turnu 2 no iha lokraik turnu 2 tanba ne’e teste hahú dader tuku 8:30 to’o tuku 6:30 lorokraik otl.

Jornalista Estajiáriu: Lazaro Pereira Quefi