Hatutan.com, (25 Marsu 2024), Díli—Prokuradór Jerál Repúblika (PJR), Alfonso Lopes hateten, prossesu ba kazu Ró Haksolok, kompeténsia iha Prokuradór Titulár nia liman tanba ne’e prossesu sei la’o no presiza tempu.

Iha loron 28 fulan Novembru tinan 2023, Koordenadora Grupu Tranallu bá Reforma Justisa, Lúcia Lobato hala’o vizita privada ida bá Figueira da Foz, Portugal hodi haree besik prosessu kontrusaun Ró Haksolok. Foto dok, Lúcia Lobato.

“Bainhira prossesu ida iha ona Prokuradór Titulár nia liman, sempre la’o  hanesan ne’e. Prossesu ne’e iha karik liu hosi sivíl, liu hosi kriminál. Bainhira prossesu ne’e la’o PJR iha devér atu labele públika sai, tanba tenke respeita,” Alfonso Lopes hateten hafoin enkontru ho Prezidente Repúblika (PR), José Ramos-Horta, iha Palásiu Prezidensiál Nicolau Lobato Bairru-Pité, Segunda (25/03/2024).

Lee Mós: Prezidente Repúblika Husu MP ho KAK Labele Politiza Investigasaun Kazu Ró Haksolok

PJR deklara katak, nia respeita jornalista sira-nia servisu atu fó informasaun, maibé parte Lei mak limita duni bainhira prossesu sei la’o hela no seidauk to’o akuzasaun, ne’e PJR kuidadu.

“Kona-bá kazu ró Haksolok, prossesu naruk ka la naruk, ne’e Prokuradór Titulár ne’ebé kaer prossesu mak hatene. Em jerál ita hanesan povu avalia katak ne’e kleur tanba saida atu dokumentu sira ne’e la’ós nar-naran ida-ne’e ita akuza ema. Prossesu investigasaun tenke rekolla hotu evidénsia, dokumentu no sasin. Entaun, prosedimentu ne’e ita hatene katak to’o agora KAK mós seidauk iha Komisáriu ne’e mós sai difikuldade,” PJR Alfonso Lopes hateten.

PJR hatutan, agora Prokuradór bele foti fali prossesu ne’e hodi delega bá órgaun polisiál kriminál seluk, tanba demora demais, maibé ida-ne’e depende no se prossesu sira ne’e sei hein Komisáriu KAK foun, ne’e polítika Governu nian no PJR laiha kompeténsia atu ko’alia bá to’o ne’ebá.

“Kona-bá prossesu investigasaun bá kazu ró Haksolok ne’e iha Prokuradór Titulár mak hatene atu kontinua prossesu investigasaun ne’e oinsa, iha faze ida-ne’e PJR labele ko’alia se la’e viola fali segredu justisa,” nia subliña.

Antes ne’e, Diretór Investigasaun KAK, José Verdial hateten, KAK konklui ona investigasaun bá kazu 38 inklui kazu ró Haksolok no submete ona bá Ministériu Públiku (MP).

Jornalista: Vito Salvadór