Hatutan.com, (27 Marsu 2024), Díli-Prezidente  Kamara Komérsiu no Indústria Timor-Leste (CCI-TL, sigla portugés), Jorge Manuel de Araújo Serrano, hateten timoroan nia osan kada fulan purvolta  millaun $5-resin mak semo bá merkadu Atambua, Timor Osidentál hodi bá kompras produtu báziku sira, hanesan tomate, supermie, sutate, masako, sigaru, trigu, mina dapur nian, raupa ho seluk-seluk tan.

Lee Mós: Adezaun Bá OMK Fó Impaktu Pozitivu Bá Ekonomia TL

PNTL Halo Apreensaun bá Kamioneta hosi Indonézia. Foto/dok

Prezidente CCI-Tl, Jorge Manuel de Araújo Serrano hato’o asuntu ida-ne’e durante intervensaun iha serimónia serimonia posse bá estrutura eleitu Asosiasaun Transporte Kontentór Portu Timor-Leste (ATCPTL-sigla Portugés) iha Salaun Auditóriu Otél D’City, Manleuana, Tersa (26/03/2024).  

CEO Grupu Media Nasionál Holding ne’e fundamenta katak  ema dehan Timor ne’e merkadu ki’ik-oan ida, NO saida mak iha ne’e. Maibé, tuir nia, sasukat bá ekonomia rai-ida nian, mak oinsá rai-kiik maibé banku boot estranjeiru sira mai loke iha Timor, hanesan BNU (Banco Nacional Utlramarinho) hosi Portugal, BRI (Bank Rakya Indonesia) ho Bank Mandiri hosi Indonézia.

“Ida-ne’e atu hatete saida, sirkulasaun osan iha rai-ne’e boot. Maibé, buat barak Timor la kaer iha ne’e, tanba osan sai hotu fali bá iha li’ur. Buat balu mak halo hela, hanesan produsaun rai-laran no buat balun komesa prodús oituan-oituan iha rai-laran,”  Jorge Serrano hateten.

Maske Timor-Leste iha ona nia Portu ne’ebé ho eskala internasionál, maibé, Jorge Serrano dehan, Portu Tibar, mós seidauk fó solusaun bá ekonomia iha rai ida-ne’e. Portu Tibar, kompara ho Portu Atapupu-Atambus, ema nian loke luan liu, kamioneta sira tama mai ne’e ho sasán nakonu, sai fali mós ho sasán nakonu.

Jorge nia observasaun katak Timor-Leste nia foos subsídiu sira ne’e mós sai hotu fali bá Atambua no  Timor Osidentál.  Tanba ne’e, sasán sira ne’ebé emprezáriu timoroan sira tenke haree, no hahú agora ne’e tenke tau ona atensaun.

Prezidente Eleitu CCI-TL, Jorge Manuel de Araújo Serrano. Foto/Dok

“Ita ko’alia, ko’alia ho baze, dadus, ita la ko’alia arbiru, halo kampaña. Ita-boot sira hatene, ita kada fulan osan sai de’it bá sorin ne’ebá Atambua, millaun  $5-liu, ne’e osan. Previzaun CCI-TL nian osan Timoroan nian sai bá Atambua kada tinan millaun  $60 para hola saida, hodi  sosa tomate, supermie, mina dapur nian, trigu, sutate sira-ne’e no seluk tan,” Jorge Serrano tenik.

Prezidente CCI-TL ne’e hatutan, to’o ohin loron, tais de’it mós la soru ona iha Timor. Iha tais market, soru, maibé lori de’it lia. Ema nian mós lori tama mai, tutur dehan halo lia, mais, halo lia hotu, sira fila ho osan.

Hanesan prezidente CCI-TL, Jorge Serrano hateten, CCI-TL iha obrigasaun atu informa bá malu, katak, organizasaun sira hanesan iha setor emprezariál nasionál ne’e importante atu tuur, la’ós hanoin dehan saida mak ninian no ida-ne’e nian.

“Saida mak ita hotu nian, atu diskute. Rai ida-ne’e bele iha polítika to’o iha ne’ebé, lideransa di’ak to’o iha ne’ebá, maibé, ita la preparadu atu ezekuta, atu suporta, rai-ne’e sei la bá oin. Ita-boot sira la’o bá mundu ona, la’o bá fatin hothotu,  susesu prezidente ida nian, primeiru-ministru ida nian, governu ida nian, sein apoiu hosi setór privadu ho sidadaun sira nian, sei la la’o,”  Jorge Serrano hateten.

Jornalista: Rogério Pereira Cárceres