Hatutan.com, (03 Abríl 2024), Díli-Tribunál Judisiál Primeira Instánsia Díli (TJPID), Kuarta (03/04/2024), tuku 16:00 Otl,  liuhosi despaxu ikus, deside hodi aplika medida koasaun prizaun preventiva bá arguido na’in-tolu ho inisial MMH, ET no AM, tanba envolve iha kazu sobu odamatan loja  LEADSO  iha Liquiça hodi  na’ok sasán iha loja laran, inklui foti osan no futu loja na’in.

Lee Mós: Polísia Kaptura Suspeitu Na’in-tolu Utiliza Karreta Luxu bá Na’ok Loja LEADSO iha Liquiça

Arguido na’in-3 bá kazu na’ok sasán iha loja LEADSO, Munisípiu Liquiça. Foto/Elio dos Santos da Costa

Defensór Substitutu Eustáquio Guterres, informa, loloos, titulár ka na’in bá prosesu ne’e mak advogadu Humberto da Costa, maibé, tanba ohin, na’in bá prosesu ne’e iha hela servisu seluk, nune’e, nia tama fila-fali hodi rona de’it despaxu hosi Tribunál, no medida koasaun saida mak atu aplika arguido na’in-tolu ne’e.

“Ne’ebé, ohin, Tribunál haree katak, medida koasaun ne’ebé mak adekuada liu maka prizaun preventiva, razaun tanba arguido na’in-tolu ne’e, uainhira halo aktu ida-ne’e, sira halo sira nian aktu, polisia bá buka, depois hodi kaer,”  Defensór Substitutu Eustáquio Guterres, informa bá jornalista sira.

Medida koasaun ida-ne’e, Tribunál aplika ho baze bá Artigu 183, Lei Kódigu Prosesu Penál, katak, arguido sira bele halakon evidénsia tán, arguido sira bele kontinua nafatin sira nian atividade, no posível arguido sira bele hasees aan hosi justisa.

“Tribunál aplika medida koasaun ne’ebé adekuada liu maka Prizaun Preventiva,” Eustáquio Guterres  tenik.

Iha despaxu ikus ne’e, Tribunál rasik konsidera katak, arguido sira komete krime tolu mak hanesan, Krime Furtu Agravadu ka Rouba, iha Artigu 253, Krime Sekuestro (tanba arguido sira kesi metin loja na’in), iha Artigu 170, Lei Kódigu Penál Timor-Leste, inklui mós Krime Arma Branka, iha Artigu 20, Lei Númeru 07/2017.

Hatán kona-bá karik parte Defeza aseita ho desizaun ne’ebé Tribunál foti, Eustáquio dehan, la’os nia mak titulár bá prosesu ida ne’e, tanba ne’e, nia parte sei buka konsulta lai ho Defensór Humberto da Costa, ne’ebé mak hanesan titulár bá prosesu ida ne’e.

“Sé bele rekursu, no bele mós la rekursu. Maibé, ha’u sei konsulta lai bá doutór ne’ebé mak titulár bá prosesu ida ne’e,” nia hateten

Hafoin rona tiha desizaun Tribunál Dili nian ne’e, Ekipa Investigadór sira Komandu Polísia Munisípiu Liquiça nian, konjunta ho ekipa Departamentu Investigasaun Kriminál Nasionál, transporta kedan arguido sira bá kumpre sentensa iha Sentru Prizionál Becora, Díli. 

Audiénsia Primeiru Interrogatóriu Judisiál ne’e prezide hosi Juiza Ercília de Jesus, Ministériu Públiku (MP), reprezenta hosi Prokuradór Ricardo Cardoso Leite, no Arguido sira hetan Asisténsia Legál hosi Defensór Manuel Sarmento ho Humberto da Costa ne’ebé substitui hosi Defensór Eustáquio Guterres.

Jornalista: Rogério Pereira Cárceres