Hatutan.com, (04 Abríl 2024), Díli—IX Governu Konstitusionál sei presta servisu loloos iha tinan 2025 tanba agora daudaun liña ministeriál sira sei halo auditoria hodi buka hadi’a naksalak sira ne’ebé Governu anteriór halo.

PM Xanana Gusmão. Foto/Elio dos Santos da Costa.

Asuntu ne’e hato’o hosi Primeiru-Ministru (PM), Kay Rala Xanana Gusmão hodi hatan bá pergunta hosi jornalista sira ne’ebé husu kona-bá bainhira mak Primeiru-Ministru halo avaliasaun dezempeñu bá servisu membru Governu sira.

Lee Mós: Xanana Halo Hela Avaliasaun bá Membru Governu Sira

“Susar atu responde. Ha’u temi tiha ona ida-ne’e, maibé ha’u hakarak repete fila-fali katak, Governu ida-ne’e atu servisu loloos só iha 2025 tanba buat sira ne’ebé agora, loron ida ami hanoin katak fó hanoin oitoan, maibé foer ne’e barak liu fali lixu ne’ebé agora iha Dili ne’e. Hamoos, hamoos, sei halo auditoria. Agora ne’e mak sei halo kuotasaun, ami estuda hela oin nusa atu fahe kazu sira bá auditoria ne’e fahe ba rua, tanba la’e lori tinan bá tinan tanba buat barak,” Kay Rala Xanana Gusmão hateten iha Palásiu Prezidensiál Nicolau Lobato Bairru-Pité, Kinta (04/04/2024).

Xefe Governu fó ezemplu ida de’it kona-bá problema sira ne’e, Prezidente Repúblika ko’alia merenda eskolár, sim, mas Governu simu problema barak ne’e tenke rezolve, ne’e mak xefe Governu  tenke esplika bá Xefe Estadu.

Xanana Gusmão  hatutan, merenda eskolár ne’ebé Governu anteriór dehan katak eskola tenke iha konta bankária no iha fatin balun labarik sira la simu merenda eskolar tanba osan sai ema balun sosa karreta ho osan konta bankária.

“Ida-ne’e ha’u husu bá Ministra Edukasaun merenda eskolar nusa, la’e, merenda eskolar agora ho MAE ne’e tanba mudansa ne’e hotu, ne’ebé MAE agora halo nusa. Semana-semana imi husu avaliasaun, mas semana-semana mós ha’u hatan katak ami sei hamoos, sei hadi’a foer ne’ebé iha,” Xefe Governu dehan.

Xanana Gusmão subliña, relasiona ho preokupasaun hosi Prezidente Repúblika ne’ebé hateten nesesáriu atu halo avaliasaun dezempeñu no ida ne’e loos, maibé membru Governu sira halo hela sira nia servisu no ezekuta mós orientasaun kona-bá oinsa atu hadi’a no hamos foer sira iha ministériu katak tenke halo auditoria tanba bainhira halo servisu de’it iha foer leten ne’e susar.

“Kada semana iha Konsellu Ministru ami sempre husu malu halo ona saida, halo loos ga la’e no saida mak bele halo bá bem estar povu nian,” Xanana Gusmão esplika.

Tanba ne’e mak ohin Xefe Governu dehan, 2025 Governu ne’e bele servisu ona, tanba iha lixu barak Governu agora atu hamoos, rezultadu auditória mak sei haree.

Jornalista: Vito Salvadór