Hatutan.com, (09 Abríl 2024), Díli—Primeiru-Ministru (PM), Kay Rala Xanana Gusmão hala’o enkontru ho Prezidente Parlamentu Nasionál (PPN), Maria Fernanda Lay ne’ebé ko’alia kona-bá kooperasaun entre Parlamentu Nasionál ho Governu liga ho lejizlasaun sira ne’ebé presiza submete bá PN hodi halo aprovasaun.

Primeiru-Ministru (PM), Kay Rala Xanana Gusmão hala’o enkontru ho Prezidente Parlamentu Nasionál (PPN), Maria Fernanda Lay iha Gabinete Fronteira Maritima, Palasiu Governu, Tersa (09/04/2024). Foto: Média PM.

Objetivu hasoru-malu ne’e atu parte rua konfirma didi’ak Lei prioridade sira ne’ebé presiza haruka lalais bá PN, liu-liu  rezolusaun Governu nian kona-bá ratifikasaun tratadu pakote adezaun Timor-Leste nian bá Organizasaun Mundiál Komérsiu (OMK).

Lee Mós: TL Ofisialmente Sai Membru Plenu iha OMK

“Ami-rua hasoru-malu, nia mai atu koordena ho Governu kona-bá lei sira, tenke koordena didi’ak molok haruka bá Parlamentu Nasionál tanba dala-ruma Governu haruka bá hodi husu urjente. Prezidente Parlamentu fó lembra mai ha’u no ha’u sei ko’alia iha reuniaun Konsellu Ministru kona-bá tratadu OMK katak tenke hetan ratifikasaun,” Hatutan.com sita deklarasaun Xanana Gusmão iha komunikadu, Tersa (09/04/2024).

Governu Timor-Leste asina ona pakote adezaun Timor-Leste bá OMK iha loron 26, fulan-Fevereiru 2024, iha Abudhabi partisipa hosi Prezidente Repúblika (PR), José Ramos Horta no PPN Fernanda Lay inklui seitór privadu sira.

Hafoin asina, Governu submete protokolu adezaun bá Parlamentu Nasionál hodi hetan ratifikasaun no iha períodu másimu to’o jullu tinan ne’e tenke submete konfirmasaun bá OMK tanba presiza loron-30 atu ekipa responsável rejista Timor-Leste ofisialmente sai membru plenu.

Timor-Leste nia esforsu adere bá OMK inisia iha loron 07 dezembru 2006, liuhosi kriasaun Grupu Traballu, nune’e hafoin tinan 14 Grupu Traballu prepara dokumentu nesesáriu sira hodi kumpre regra OMK.

Iha loron 01 outubru 2020, Timor-Leste realiza enkontru Grupu Traballu dahuluk ho nasaun membru OMK sira hodi diskute ho kle’an kona-bá seriedade aplikasaun sai membru plenu.

Durante ne’e Timor-Leste hamutuk ho país 22 seluk sai observadór hodi akompaña prossesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Hanesan país observadór, Grupu Traballu hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun bá organizasaun mundiál komérsiu ne’e ho hanoin ida katak, Governu bele halo parseria ho seitór privadu nasionál no internasionál atu loke kampu traballu ba timor-oan.

OMK hanesan organizasaun neʼebé regula komérsiu entre país sira ho objetivu atu garante katak atividade komersiál hotu la’o ho forma fásil, livre, previzível no posível.

Jornalista: Rogério Pereira Cárceres