Hatutan.com, (11 Abríl 2024), Díli- Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério de Fátima Lobato, Kinta (11/04/2024), aprezenta investor internasionál ida ho nasionalidade Xina bá Prezidente Repúblika, José Ramos-Horta iha Palásiu Prezidensiál.

Lee Mós: Aero Dili Substitui Aviaun ZEESM Semo bá Oé-Cusse

Investor internasionál hosi Xina ne’e iha kompromisu atu atu investe osan ho valór millaun $70 hodi raabilita  no haluan konstrusaun bá Otél Fitun Lima iha Oe-Upu, Ambeno.

PA-RAEOA, Rogério Tiago de Fátima Lobato aprezenta investór Xina atu investe ho kapital millaun $70 iha RAEOA. Foto/mídia PR

“Ha’u lori grupu investidór ida atu aprezenta bá Prezidente Repúblika, grupu ida hakarak investe iha Oé-Cusse, iha reabilitasaun Otél Oe-Upu nian, tanba RAEOA investe tiha ona millaun $14 iha Otél Fitun Lima ne’e, maibé Otél ne’e abandonadu, aat hotu ita la uza tamba ne’e iha grupu Emprezariál ida husi Xina, Shanghai hakarak atu halo investimentu ho valór millaun $70,” Rogério Tiago Lobato haktuir bá jornalista sira hafoin hasoru malu ho PR Ramos-Horta.

Prezidente Autoridade ne’e esplika katak grupu Emprezariál husi Xina ne’e la’ós de’it atu reabilita Otél Fitun Lima iha Oe-Upu, maibé atu halo luan tan Otél ne’e, halo boot liu tan, no otél ne’ebé di’ak tanba oras ne’e investidór sira komesa ba barak ona iha Oe-Cusse, sira buka Otél atu hela entaun ne’e hanesan atividade ida investedór ida ne’ebé urjente uitoan.

Tuir lei se investimentu ho montante millaun $20 mai kraik Prezidente Autoridade iha kompeténsia atu aprova, maibé investimentu ne’e  boot liu millaun $20 tenke lori planu investimentu mai aprezenta bá Primeiru-Ministru depois lori ba iha Konsellu Ministru, no Konsellu Ministru sei deside kona-bá investimentu ne’e.

“Bainhira to’o ona iha kontratu ha’u sei ezije ba sira katak semana ida molok asina sira tenke aprezenta konta bankária ne’ebé loke dunik iha Oé-Cusse no liu fulan lima obra tenke hahú ona, ita tenke sériu la’ós ko’alia de’it, sira hanesan investidór mós tenke kumpre sira nia parte. Ita sei tau parte legál ida atu defende Oé-Cusse nia interese no ko’alia ho sira bele envolve iha projetu ne’e,” Rogério Lobato afirma.

Iha enkontru ne’e Prezidente Repúblika José Ramos-Horta dehan Timor nia relasaun ho Xina di’ak, la’ós foin estabelese, investidór sira ne’ebé mai hosi Xina sempre enkoraja atu halo investimentu iha Timor.

Xefe Estadu dehan Xina halo tiha ona investimentu barak iha Timor hanesan Palásiu Prezidensiál, MNEC maibé Xefe Estadu dehan tenke halo kooperasaun ida ne’ebé boot liu iha Timor tenke envolve Governu rua ne’e, atu haree saida-saida mak Xina bele halo durante tinan lima no bá futuru.

Jornalista: Vito Salvadór