Hatutan.com, (12 Abríl 2024), Díli-Sekretáriu Jerál Partidu  Demokrátiku (PD),  António da Conceição “Kalohan”  hato’o agradese ua’in bá ekipa defeza ne’ebé fó asisténsia legal bá kazu ne’ebé nia enfrenta no agradese mós bá Tribunál Rekursu (TR) ne’ebé foti desizaun final hodi aboselve nia hosi pena prizaun efetivu tinan-lima (5).

Lee Mós: Tribunál Rekursu Absolve António “Kalohan” Hosi Pena Prizaun Tinan-Lima

António da Conceição “Kalohan” (klaran) ho nia advogadu privadu na’in-rua halo konferénsia imprensa, Sesta (12/04/2024). Foto/ Lazaro Pereira Quefi

“Ha’u agradese bá ha’u-nia advogadu sira, liu hosi konsultoria SJG ne’ebé presta asisténsia legal iha kazu ida-ne’e. Ha’u agradese bá sira ohin ha’u hetan desizaun ikus hosi Tribunál Rekursu ne’ebé maka absolve totalmente sein kondisaun ruma hosi pena ne’ebé mak ha’u simu iha loron 8 fulan-Janeiru 2024 hosi Tribunál Judisiál Primeira Instánsia Díli (TJPID) ho pena sentensa tinan-lima (5) efetivu. Ne’e mak desizaun ohin loron fó fali ha’u nia naran ida António da Conceição ‘Kalohan’ ne’e atu hamriik fila fali hanesan uluk,” António da Conceição ‘Kalohan” haktuir bá jornalista sira iha konferénsia imprensa iha Díli, Sesta (12/004/2024).

Uza oportunidade ida ne’e mós, António Conceição “Kalohan”  louva bá Tribunál Rekursu sira nia servisu ne’ebé ho profisionál no imparsiál sira hatudu duni kbit ne’ebé mak hola desizaun ida ne’ebé mak justu bá kazu ida-ne’e.

“Ohin, ha’u foin sente bá nia an no la’o iha Díli laran ne’e ho dignidade, la’ós hanesan uluk desizaun sai tiah ona ne’e iha Tribunál. Desizaun Tribunál ne’ebé mak ohin fó bá ha’u hanesan repoin fila fali ha’u nia an hanesan ema, hanesan mós polítiku,” Sekretáriu Jerál Partidu Demokrátiku (PD)  ne’e hateten.

Louva tebes ho desizaun  ida-ne’e tanba bele fó duni  garantia ida katak justisa mós sei iha nune’e la’ós kontente ho desizaun ne’e de’it maibé mós agradese tanba se nafatin fó oportunidade atu bele halo tan buat ruma bá rai ida-ne’e.

Ikus liu, António Conceição “Kalohan”  dehan kazu ne’e sai hanesan lisaun ida bá hotu-hotu katak presiza dehan malu tenke ser buka ho lia-loos no labele halo de’it iha kotuk ka subar-subar maibé buat hotu tenke liu hosi prosesu edukativu ida.

Iha fatin hanesan advogadu privadu  Pedro Camões hateten, dezde inísiu kedas iha julgamentu iha primeiru instánsia ate aprezenta rekursu hosi parte defeza konvensidu katak Antonio da Conceição la iha sala bá kazu ida ne’e, maibé tribunal fó desizaun oin seluk baze ho razaun ne’ebé mak anteriormente fiar katak laloos.

“Ida ne’e mak halo rekursu haruka bá Tribunál Rekursu konfirma bá Antonio da Conceição  nia defeza katak la iha desizaun seluk ne’e mak absolve nia hosi desizaun ida anterior.  Nia (António Conceição, red) livre no la iha kondenasaun bá kazu ida-ne’e. Ohin Tribunál dehan tiha ona, rekursu ne’ebé ami hatama ne’e presedente no simu no absolve Antonio da Conceição hosi desizaun anteriormente,” Pedro Camões esplika.

Rekursu ne’ebé mak hatama reprezenta de’it Antonio da Conceição katak nia okupa nia kargu iha ne’ebá hanesan Ministru MCI, iha momentu ne’ebá simu profile empreza ninian depois nia muda ona bá iha Ministériu Edukasaun  mak nia la envolve kualkér atividade ne’ebé mak prokuradór, tribunal ho ema ne’ebé mak sira  ko’alia iha durante periodu ida ne’e.

António Conceição “Kalohan”, tenik Pedro Camões, livre ona hosi akuzasaun falsu durante nia tama iha tribunál hanesan arguido, agora absolve katak nia la sala iha desizaun ida ne’e. Altura ne’ebá tribunal mak falla iha nia analiza tékniku ruma no agora Tribunál Rekursu dehan laloos.

Jornalista Estajiáriu : Lazaro Pereira Quefi