Hatutan.com, (07 Maiu 2024), Díli- Prezidente Repúblika (PR), José Ramos-Horta, louva servisu  Prokurador Jerál  Repúblika (PGR, sigla portugés), Alfonso Lopez, tamba laiha politizasaun no sempre neutru iha desizaun sira.

Lee Mós: Tinan-2 Liu Ona, PGR Alfonso Lopez Konfirma Nafatin Kazu Projetu Instalasaun Set-Top Box RTTL.E.P iha Prosesu Laran

Prokuradór Jerál Repúblika (PGR-Sigla Portugéss), Alfonso Lopez. Foto/Dok

“PGR menus politizasaun, nia buka para iha klaran no nia sempre neutru, imparsiál, maibé nia simu problema barak iha kotuk, tamba tinan hirak liubá ne’e ema partidariza no politiza, nia la konsege ohin kedas rezolve mesmu iha tinan hirak nia laran, maibé ha’u husik bá nia desizaun,” Prezidente Repúblika José Ramos-Horta bá jornalista sira iha Timor Plaza, Tersa (07/05/2024).

Seidauk Rona Rezignasaun

Prezidente Repúblika, José Ramos-Horta hateten mós katka nia seidauk rona kona-bá PGR Alfonso Lopez nia pedidu bá rezignasaun.

“Se PGR hakarak rezigna an ne’e la problema ka se-se de’it mak atu rezigna an bele. Kona-bá PGR nia rezignasaun, ha’u la rona, klaru katak nu’udár jornalista ho imi nia matenek imi bele hatene uluk informasaun antes ke ha’u hatene,” Ramos-Horta hateten.

Xefe Estadu haktuir servisu di’ak ho PGR Alfonso Lopez, merese atu hetan respeitu, ema ida ne’ebé nakonu ho umilde, simples no la foti an ho nivel akademiku boot.

Jornalista: Vito Salvadór