Hatutan.com, (12 Abríl 2024), Aileu-Dadus veteranu sira nian ne’ebé rejistadu iha 2009 seidauk bele anúnsiu to’o ohin loron tanba Governu liuhosi Ministériu bá Asuntu Kombatente  no Libetasaun Nasionál (MAKLN) la konsege prevee nia orsamentu iha Orsamentu Jerál Estadu (OJE) 2024.

Lee Mós: Governu La Prevee Osan iha OJE 2023 bá Validasaun Dadus Veteranu 2009

Ministru bá Asuntu Kombatente no Libertasaun Nasionál, Gil da Costa Monteiro “Oan-Sorru”. Foto/Rogério Pereira Cárceres

Ministru bá Asuntu Kombatente no Libertasaun Nasionál, Gil da Costa Monteiro “Oan-Sorru”, hateten dadus veteran sira ne’ebé rejistu iha 2009 konklui ona verfikasaun iha loron 28 fulan-Outubru 2023.

“Ne’ebé, ita labele prevee orsamentu hosi orsamentu jerál  estadu, la bazeia bá númeru. Ne’e sala, kontra lei. Tanba ne’e maka MAKLN labele halo buat ida ho ida-ne’e,” Ministru Gil da Costa Monteiro “Oan-Sorru”, hateten durante halo abertura seremónia Lansamentu Ofisial bá Programa Konfirmasaun no Validasaun Dadus bá Ema Ne’ebé Mate Iha Funu Tanba Ukun-Rasik Aan Tuir Uma-lisan iha Suku Aissirimou, Postu Administrativu Aileu Vila, Munisípiu Aileu, Sesta (12/04/2024).

Oan-Soru dehan, sé dadus ne’e mak verifika hotu kedas iha fulan-Abríl, Marsu ka fulan- Juñu 2023 liubá, dala-ruma iha mandatu IX Governu nian ne’e bele prevee automátikamente orsamentu ruma ho dadus ne’ebé definitivu. Maibé, verifikasaun ne’e remata iha loron 28 fulan-Outubru 2023, entaun seidauk bele fiksa númeru ida para hodi prevee orsamentu. Ne’ebé hirak ne’e hein bá ninia konkluzaun halo iha 2025.

Kona-bá bainhira mak MAKLN  halo validasaun bá lsita ka dadus hirak ne’e, Oan-Soru dehan, sira sei haree, tanba programa ministériu ninian barak tebtebes, programa ida kona-bá konfirmasaun no validasaun dadus bá ema ne’ebé mate iha funu tanba ukun-rasik aan tuir uma-lisan nian de’it mós boot, hamutuk rihun 233, entaun, ida-ne’e la’os buat ne’ebé fásil.

“Ami labele promete dehan aban ka bainrua, mais, ein-prinsíspiu, 2025 prosesu la’o. La’ós hotu, sé ita prevee bá ida ne’e hotu, agora dadauk osan fundu mina-rai nian dehan hela billaun $17 ne’e, foti de’it mai dala-ida, hotu ona,” Oan-Soru promete.

Tuir dadus MAKLN nian, veteranu sira ne’ebé rejistadu iha tinan 2009 hamutuk 124,782.000.

Jornalista: Rogério Pereira Cárceres