Hatutan.com, (16 Abríl 2024), Díli- Governu Japaun iha kompromisu apoiu konstrusaun no kompleta fasilidade infraestrutura iha Ospitál Nasionál Guido Valadares (HNGV, sigla portugés) hodi tulun Timor-Leste nia dezenvolvimentu iha setór Saúde.

Lee Mós: Pasiente Mate iha HNGV La’ós Tanba Ai-moruk Laiha no Estoke Mamuk Sempre Bazeia bá Dadus

Ospitál Nasionál Guido Valadares (HNGV). Foto/Dok.Espesiál

Primeiru Ministru Interinu no Vise-Primeiru-Ministru no Ministru Koordenadór bá Asuntu Ekonomia no Ministru Turizmu Ambiente, Francisco Kalbuadi Lay bá jornalista sira iha Farol, Díli,  Tersa (16/04/2024), hateten Japaun  sempre sai hanesan parseiru ida ne’ebé iha relasaun di’ak tebes ho Timor-Leste dezde restaurasaun independénsia, 20 fulan-Maiu 2002.

Nia afirma nia parte lori Governu ne’e nia naran halo reuniaun ho reprezentante Japaun nian atu hare posibilidade ne’ebé  Governu Japaun atu ajuda iha área saúde nian, liu-liu konstrui no kompleta fasilidade infraestrutura iha HNGV.

Japaun ho Governu Timor-Leste  diskute kona-bá projetu konstrusaun  HNGV  hanesan  asuntu sosiál ba área  saúde   ninian.

Konstrusaun bá ospitál ne’e daudaun Japaun ho Timor-Leste  diskute ona  bill of Quantity (BOQ), tempu barak sei hato’o bá Konsellu Ministru hodi halo aprovasaun bá konstrusaun.

“Ha’u ho Vise-Primeiru-Ministru Mariano Assanami  Sabino no Embaixadór Japaun halo enkontru atu ko’alia kona-ba apoiu ne’ebé Japaun sei halo liu-liu bá konstrusaun HNGV iha tempu badak,” Francisco Kalbuadi Lay hateten.

Nia hatutan Timor-Leste no Japaun nia relasaun bilaterál kontinua no Japaun kontinua fó apoiu  barak hanesan rekursu umanu  no dezenvolvimentu oin-oin ninian.

Iha fatin hanesan Vise-Primeiru-Ministru no Ministru Koordenadór Asuntu Dezenvolvimentu Rural no Abitasaun Komunitária, Mariano Assanami Sabino hateten Governu Timor-Leste presiza halo preparasaun hodi simu apoiu husi Governu Japaun.

“Ha’u hanoin saida maka Primeiru Ministru interinu hato’o tiha ona katak presiza iha karta intensaun para ita bele simu apoiu ne’ebé Japaun fó tanba ne’e ami prontu hodi prepara karta ne’e,” Mariano Assanami Sabino tenik.

Embaixadór Japaun mai Timor-Leste, Tetsuya Kimura hateten iha sorumutuk ida ohin ne’e diskute kona-bá projetu konkretu ba konstrusaun fasilidade infraestrutura iha HNGV no Japaun iha kompromisu atu halo konstrusaun ho nivel kualidade ho estandardizasaun médika ida as iha Timor-Leste.

“Ami mos diskute ona ho Ministériu Saúde para bele realiza projetu ida ne’e no ami planeia atu haruka ba misaun JICA nian iha tempu badak atu bele konkretiza no realiza planu ida ne’e,” Embaixadór  Tetsuya Kimura hateten.

Nia hatutan hafoin dezeña bá konstrusaun ne’e prontu ho orsamentu ba konstrusaun iha ona atu bele suporta projetu ne’e JICA sei lori ekipamentu sira husi Japaun hodi hahú konstrusaun bá futuru.

Japaun kontente no orgullu ho diskusaun sira ne’e hamutuk ho Vise-Primeiru-Ministru na’in-rua no Governu Japaun iha kompromisu atu kontinua tulun prosesu dezenvolvimentu iha área saúde ne’ebé Timor-Leste presiza.

Sorumutuk ne’e organiza hosi Primeiru-Ministru Interinu no Vise-Primeiru-Ministru no Ministru Koordenadór Asuntu Ekonomia no Ministru Turizmu Ambiente Francisco Kalbuadi Lay, partisipa hosi  Vise-Primeiru-Ministru II, no Ministru Koordenadór Asuntu dezenvolvimentu  Rural no Abitasaun Komunitária, Mariano Asanami Sabino Lopes, Ministra Saúde Élia A.A  dos Reis Amaral no Embaixadór Japaun iha Timor-Leste, Tetsuya Kimura.

Jornalista: Vito Salvadór