Hatutan.com, (17 Abríl 2024), Díli-Ministru Justisa (MJ), Sérgio de Jesus Fernandes da Costa Hornai, sei foti medida forte to’o bele halo demisaun bá pesoál membru Policia Ciêntíficia e de Investigação Criminal (PCIC) ida ne’ebé deskonfia husu osan bá fujitivu Arnolfo Teves Jr nia oan-mane, foin lalais ne’e.

Lee Mós: PCIC Suspende no Averigua Membru Ne’ebé Deskonfia Husu Osan bá Oan Mane Fujitivu Alnolf Teves Jr

Ministru Justisa, Sérgio de Jesus Fernandes da Costa Hornai. Foto/Elio dos Santos da Costa

Ministru Sérgio Hornai hateten prosesu hasoru pesoál  membru PCIC ne’e la’o tiha ona no medida balu mós foti ona, tanba sidadaun sé de’it mak envolve iha kazu no komete karik infrasaun rum  tenke submete bá prosesu investigasaun kriminál.

“Sidadaun hothotu ne’ebé maka envolve bá iha kazu infrasaun, irregularidade, ilisítiu  tenke sujeita bá iha prosesu investigasaun no prosesu tuir lei haruka. Medida, sé saida, hasai nia hosi servisu,” Ministru Justisa (MJ), Sérgio Hornai, hateten bá jornalista sira, hafoin partisipa iha sorumutu Konsellu Ministru iha Palásiu Governu,  Díli, Kuarta (17/04/2024).

Ministru  Sergio Hornai simu ona relatóriu ruma relasiona ho prosesu investigasaun bá pesoál membru PCIC ne’e, maibé nia seidauk belepronúnsia buat ruma bainhira iha hela prosesu nia laran.

“Lei la admite dehan katak, funsionáriu sira tenke kobra osan hosi sidadaun ruma. Hein prosesu ne’e to’o mai, ha’u halo desizaun,” Ministru Sérgio Hornai afirma.

Governante ne’e mós informa katak, dadaun ne’e Governu RDTL ho Filipina halo hela negosiasaun bá prosesu atu halo estradisaun bá fujitivu Arnolfo Teves Jr nu’udár sidadaun Filipina ne’ebé daudaun ne’e kumpre hela prizaun preventiva iha Prizaun Becora.

“Lei iha ona, agora ita hela implementasaun de’it. Prosesu autoridade sentrál, governu, sei halo servisu namanas loos ho Governu Filipina, konserteza, ita sei halo desizaun ida iha tempu oportunu. Sé dehan estradisaun, ita tenke halo estradisaun, konforme iha ita-nia akordu resíprosidade entre país rua nian iha ka lae. Iha entendimentu kona-bá ida ne’e ka lae,” Sérgio Hornai hateten.

Iha Tersa, 09 fulan-Abríl 2024, liuhosi konferénsia imprénsa, Portavós PCIC, Mário Tavares, fó sai katak, PCIC liuhosi nia ekipa investigadór sira loke ona prosesu averiguasaun hasoru pesoál membru ho inisiál OdCA ne’ebé deskonfia husu osan bá fujitivu Arnolf Teves Jr nia oan-mane liuhosi gravasaun audio iha média sosiál WhatsApp, foin lalais ne’e.

Tuir prazu legál ne’ebé iha katak, prosesu averiguasaun ne’e sei lori tempu loron sanulu, sura hosi Segunda  to’o Kuarta (08-16/04/2024). Maski nune’e, prosesu ne’e mós sei depende bá iha rezultadu averiguasaun.

Jornalista: Rogério Pereira Cárceres