Hatutan.com, (12 Abríl 2024), Díli – Advogadu privadu, Pedro Camões ne’ebé fó asisténsia legal bá arguido António da Conceição ‘Kalohan’, informa  katak iha Kinta, 11 fulan-Abríl 2024, Tribunál Rekursu hasai ona desizaun hodi absolve pena prizaun efetivu tinan-lima (5) bá nia kliente Antonio da Conceição ‘Kalohan’.

Lee Mós: Mari Alkatiri Fó Korajen no Solidariedade Bá António Kalohan

Sekretáriu Jerál Partidu Demokrátiku (PD), deputadu António da Conceição ‘Kalohan’. Foto/Tome da Silva.

Iha Segunda 08 fulan-Janeiru 2024, Tribunál Judisiál Primeira Instánsia Díli (TJPID) liuhosi desizaun ikus kondena arguido António da Conceição “Kalohan” ho arguido Apolinario dos Santos Assunção bá tinan lima kadeia, tanba konsidera akuzasaun sira antes ne’e hosi Ministériu Públiku (MP), maioria provadu no iha prosesu judisiál ida-ne’e, Tribunál absolve arguido Domingos Gouveia bá kazu produsaun masin iha área Atabae, Munisípiu Bobonaro.

“Tribunal Rekursu hasai ona desizaun bá ami nia rekursu ne’ebé foin daudaun ha’u hatama. Tribunál Judisiál Primeiru Instánsia Díli notifika, horiseik, notifika uluk ha’u nia kliente António da Conceição nia simu notifikasaun ne’e Tribunál Rekursu absolve ha’u nia kliente hosi pena efetivu prizaun tinan-lima (5) bá krime partisipasaun ekonomia iha negósiu ne’ebé Ministériu Públiku imputa bá ha’u nia kliente,” Pedro Camões hateten bá jornalista sira via telefónika, Sesta  (12/4/2024).

Pedro Camões klarifika katak iha akordaun ne’e Tribunál Rekursu haree katak la iha faktu sufisiente ne’ebé mak atu bele kondena Antigu Ministru Komérsiu Indústria (MCI)  ne’e bá pena efetivu tinan-lima (5) liga bá krime partisipasaun ekonomia negósiu ne’ebé Ministériu Públiku imputa hela ba nia.

“Ida-ne’e mak desizaun ikus hosi Tribunál Rekursu bá ami nia rekursu ne’ebé foin daudaun ami hatama bá hodi kontesta desizaun Tribunál Judisiál Primeira Instánsia,” nia hateten.

Hosi sorin seluk mós defeza Marçal Masquerinhas ne’ebé fó asisténsia legál bá arguido Apolinario dos Santos Assunção hateten, Tribunál hasai ona desizaun bá rekursu ne’ebé momentu nia hatama iha Tribunal Primeira Instánsia hodi kontesta desizaun Tribunál ne’ebé kondena nia kliente Apolinario dos Santos ho  pena efetivu prizaun tinan-haat (4).

“Ha’u foin mak simu notifikasaun hosi Tribunál Judisiál Primeiru Instánsia Díli bá ami nia rekursu ne’ebé foin daudauk ami hatama. Hosi akórdaun ne’e Tribunál Rekursu absolve arguido António Kalohan hosi pena prizaun efetivu tinan-lima (5) tanba ne’e mak ha’u nia kliente Apolinario mós Tribunál aplika hamenus nia pena efetivu hosi tinan-haat (4) bá pena efetivu  tinan-tolu (3) no suspende bá tinan-lima (5),”  Marçal Masquerinhas hateten.

Lee Mós: “Kalohan” Kondenadu Kadeia Tinan Lima bá Kazu Produsaun Masin Atabae

Jornalista Estajiáriu:  Lazaro Pereira Quefi