Hatutan.com, (26 Abríl 2024), Díli– Eis-profesór kontratadu sira hamutuk ho veteranu Cornelio Gama “L7”, Sesta (26/04/2024), halo audiénsia ho Prezidente Parlamentu Nasionál, Maria Fernanda Lay, hodi buka solusaun bá sira-nia problema.

Lee Mós: Bankada FRETILIN Konsidera Governu Laiha Seriedade Rezolve Eis-Profesór Kontratadu Sira-Nia Problema

Profesóra kontratadu ida kumu-liman metin kontra desizaun Ministra Eduksaun, Dulce de Jesus tanba Governu la estende sira-nai kontratu. Foto/Dok. Hatutan.com 

“Ami laiha desizaun simplesmente ita -oot sira mós akompaña depois 30 dias maismenus ha’u enkontru ho profesór sira ne’e ha’u promete katak dentru 30 dias ha’u sei fó hikas nian rezultadu klaru katak la’ós ha’u mak halo servisu ne’e, maibé ha’u fó bá komisaum kompetente,” PPN Maria Fernanda Lay haktuir hafoin sorumutuk ho reprezentante eis-profesór kontratadu sira ne’e iha PN.

Nia hateten tanba eis-profesór kontratadu sira husu  para atu halo audiénsia fali ho sira tanba iha debate ida husu PPN mak atu sai mediador ho Ministériu Edukasaun iha meza redonda nia rekuza tanba públiku hatene saidá mak espasu tanba ne’e PPN lori bá plenária maibé iha plenária mós konkluzaun laiha tanba mosu barullu ne’ebé deputadu sira.

PPN Maria Fernanda Lay husu Komisaun G ne’ebé trata asuntu Edukasaun Joventude Sidadania  no Kultura  halo tán akompañamentu bá lei sira ne’ebé sira temi no jurista sira iha Parlamentu Nasionál hodi haree took bele rezolve klaru katak sira husu atu lori bá Primeiru-Ministru Kay Rala Xanana Gusmão.

“Maibé, ha’u dehan, lae, ha’u tenke rona lai problema ne’e saidá mak ita labele rezolve mak lori bá Primeiru-Ministru.  Solusaun mak ami sei kontinua rona no análize fali no sira hateten dehan lei fó dalan, maibé Ministéiu Edukasaun no Komisaun Funsaun Públiku dehan lei la fó problema ne’e interpreta lei mak laloos ka nusa ha’u lahatene maibé tenke verifika didi’ak fali hodi oinsá ita bele rezolve,” PPN Maria Fernanda Lay tenik.

Iha fatin hanesan Porta-Voz eis-profesór kontratadu, Agostinho Pinto hateten enkontru ne’e hanesan audiénsia bá segundu faze liu-liu bá rezultadu plenária ne’ebé mak hala’o tiha ona, maibé iha momentu ne’ebá la hetan konkluzaun entaun ohin mai para solusaun saida mak Parlamentu Nasionál bele ajuda.

“Ami mantein nafatin ami nian ezisensia tuir lei ne’ebé mak hatuur ona no PPN nafatin  rona no sintuneza no sei hato’o problema ne’e bá Primeiru-Ministru no fó fali kompeténsia bá komisaun G atu kontinua buka solusaun bá problema profesór sira nian, tanba ohin seidauk iha solusaun no solusaun ne’e Governu liu-liu Ministériu Edukasaun mak bele. Nune’e ami nafatin fó fiar bá PN nu’udár reprezentante povu atu tuur hamutuk ho primeiru ministru oinsá atu solusiona problema ida-ne’e,”  Agostinho Pinto hateten.

Nia haktir katak tuir informasaun ne’ebé foin daudaun fó sai iha Plenária katak maluk kontradu 2023 hamutuk 973 mak partisipa iha bolsa kandidatu ne’ebé loke husi Komisaun Funsaun Públika Kno na’in 50 mak liu iha prosesu refére.

Veteranu Cornelio Gama “L7” ne’ebé  akompaña eis-profesór kontratadu hodi halo audiénsia ho PPN ne’e haktuir  komu patrimóniu nasaun nian funu nian uluk iha funu  dehan mate ka moris ukun rasik aan no profesór sira mate ka moris eduka oan sira para futuru ne’e kaer nasaun ida-ne’e, maibé veteranu triste uituan tanba hasai tiha profesór sira.

“Sé ita hapara tiha profesór 1715 impede tiha ita nia oan sira nian futuru,” Cornelio Gama L7  haktuir.

Tuir informasaun ne’ebé foin daudaun fó sai iha plenária PN, katak eis-profesór  kontradu 2023 hamutuk  na’in-973 mak partisipa iha bolsa kandidatu no na’in-50 aprovadu iha selesaun  prosesu rekrutamentu hosi CFP ne’e.

Jornalista Estajiária : Zita Menezes