Hatutan.com, (06 Abríl 2024), Díli—Servisu Rejistu Verifikasaun Emprezariál, Institutu Públiku (SERVE I.P) husu bá emprezáriu nasionál sira atu labele taka kompañia bainhira enfrente problema.
Diretór ezekutivu SERVE I.P, Florêncio Sanches husu ne’e relasiona ho pedidu hosi kompañia nasionál sira kuaze 3.000 desde 31 janeiru to’o 31 marsu tinan ne’e, relasiona ho alterasaun atividade no balun taka duni kompañia.
Lee Mós: Prezidente Repúblika Husu SERVE ho Trade Invest Servisu Profisionál
Florêncio Sanches haktuir, maski iha pedidu barak, maibé SERVE I.P foin verifika de’it 1.300-resin, tanba tenki bazeia ba Lei.
“Komparasaun ho tinan rua bá kotuk, kompañia ne’ebé mak taka hamutuk 66 tanba emprezáriu barak mak assesu ona informasaun liu hosi mídia no komprende ona katak bainhira kompañia hasoru problema la persiza taka maibé altera de’it mak nia atividade ka suspende de’it,” Florencio Sanches hateten bá jornalista Hatutan.com iha knaar fatin obrigadu barak, segunda (06/05/2024).
Florêncio Sanches esplika, bainhira kompañia ida foti desizaun taka nune’e nia labele moris ona, sei implika bá kompañia tanba bainhira hakarak halo fali atividade entaun labele ona.
“Daudaun ne’e iha ona pedidu barak hosi kompañia sira kona-bá atu taka kompañia maibé tenki submete bá iha Ministériu Finansas, liu hosi Autoridade Tributária, nune’e bele identifika kada kompañia iha dívida ka iha devér, nune’e bele prossesa nia pedidu,” nia dehan.
Tanba ne’e, SERVE I.P husu kompañia idak-idak atu keta foti desizaun taka kompañia tanba daudaun seitór ne’ebé Governu promove hodi apoia emprezáriu nasionál sira mak hanesan seitór agrikultura, turizmu no indústria.
Tuir dadus hosi SERVE I.P, daudaun ne’e seitór agrikultura atinje ona 40%, turizmu to’o ona 20%, enkuantu ki’ik liu maka indústria kuaze 10% maibé pelo menus ema bele ona assesu bá seitór hirak ne’e no Governu mós hahú investe fundu iha banku komersiál sira ho montante millaun $50, atu emprezáriu sira bele assesu hodi halo negósiu tuir rekezitu ne’ebé iha.
Kompañia hirak ne’e maioria kompañia nasionál ho na’in Timor oan no kompañia ne’ebé na’in hosi estranjeiru hamutuk 4.000, kompañia internasionál ka kompañia bo’ot ne’ebé mai hosi nasaun seluk hanesan Heineken no seluk tán hamutuk 100.
Dadus totál kompañia iha territoriu nasionál ne’ebé rejista iha SERVE I.P hamutuk 45.000.
Jornalista: Leopoldina de Carvalho