Hatutan.com, (16 Maiu 2024), Díli-Governu Repúblika Indonézia liuhosi Fundu Kooperasaun Internasional bá Dezenvolvimentu ka Indonesia AID, oferese bolsa estudu bá Timoroan sira ne’ebé  hakarak estuda iha área kontabilidade nian iha universidade sira iha Indonézia.

Lee Mós: Indonesia Salurkan Rp 4,4 Miliar Dukung Program Reformasi Manajemen Keuangan Timor-Leste

Ministra Finansas, Santina de Sousa Cardoso. Foto/Rogério Pereira Cárceres

Programa bolsa estudu ida-ne’e ho baze nota entendimentu ka asinatura akordu kontribuisaun ida ne’ebé mak asina tiha ona hosi Tormarbulang Lumbantobing, CEO AID Indonesia nian ho Regina dé Jesus dé Sousa, Diretor-Jerál Tezouru Ministeriu Finansas Timor-Leste nian no Ministra Finansas, Santina de Sousa Cardoso ho Embaixadór Okto Dorinus Manik, sai sasin iha serimónia ne’ebé hala’o iha Auditóriu  Xanana Gusmão, Ministériu Finansas, Díli, Kinta-feira (16/05/2024).

Asinatura akordu kontribuisaun ida-ne’e, AID Indonézia, kontribui asisténsia ho valór totál Rp 4.4 biliaun bá implementasaun Programa Reforma Jestaun Finanseira Timor-Leste.

Programa reforma jestaun finanseira Timor-Leste ne’e foku liu bá “Dezenvolvimentu Padraun Kontabilidade Públika no Privádu no Programa Dezenvolvimentu Ezekutivu: Sistema Jestaun Finanseira Governu Indonézia nian bá Timor-Leste”.

Ministra Finansas, Santina de Sousa Cardoso, informa, programa ida-ne’e hahú tiha ona iha tinan 2023 iha ne’ebé Ministériu Finansas hamutuk ho Indonézia AID ne’ebé mak halo kooperasaun ida atu bele apoiu liu-liu kona-bá padraun kontabilidade setór públiku nom ós setór privádu nian.

“Ida-ne’e para atu bele formaliza liután bá faze segundu nian, inklui mós formasaun ne’ebé mak sira sei fó funsionáiru ministériu finansa, no mós bolsa  estudu foun bá Timoroan sira ne’ebé hakarak estuda iha área kontabilidade nian, atu nune’e ita bele komesa ona iha padraun kontabilidade ida bá setór públiku no mós setór privádu nian,” Ministra Finansas, Santina de Sousa Cardoso, informa bá jornalista sira hafoin fó sasin iha seremónia asinatura nota entendimentu ne’e  hosi RI ho TL ne’e.

Hatán kona-bá oinsá mak Governu TL bele garante implementasaun sira programa rua ne’e, Ministra Santina de Sousa Cardoso dehan, agora dadauk ne’e ekipa diresaun jerál tezouru no mós diresaun jerál servisu korporativus Ministériu Finansa nian haree bá implementasaun, haree regulamentu ne’ebé presiza, no mós formasaun sira ne’ebé mak nesesáriu.

Hosi parte diresaun jerál servisu korporativus sei halo prosesu, koolaborasaun hamutuk ho embaixada Indonézia iha Timor-Leste  no mós stand hosi Indonézia nian, atu halo rekrutamentu bá bolsa estudu sira ne’e.

“Ne’ebé, tinan kotuk, komesa ona ho na’in-21 ka 28 ne’ebé mak haruka ona bá estuda iha Indonézia iha área kontabilidade,” Ministra Santina Cardoso  informa.

Ministra Santina espekta katak, ho ajudu finanseira ida-ne’e sei impaktu ida ne’ebé mak pozitivu tebes, liu-liu bá área kontabilidade reforsa kapasidade hosi diresaun jerál tezouru nian.

Haktuir iha karta komunikadu ne’ebé mak Hatutan.com asesu katak, bá tinan 2024 ne’e, AID Indonézia nia planu atu fó asisténsia bá setór edukasaun, finansas no governu sira ne’ebé hamutuk Rp 28.06 millaun.

Programa ida-ne’ebé implementa iha tinan 2024 mak Bolsa Estudu AID Indonezia (TIAS), ne’ebé Timor-Leste mak nasaun ne’ebé hetan bolsa estudu barak liu ho estudante hamutuk 89, no to’o oras ne’e hetan ona atendimentu hosi kandidatu sira bá nivel lisensiatura nian iha universidade Indonézia.

Jornalista: Rogério Pereira Cárceres