Connect with us
Pakote Ahi

Justisa & Krime

Suspeitu Na’in-Hitu Ne’ebé Hadau Telefone To’o Rezulta Nituchia Lakon Vida Submete bá Primeiru Interrogatóriu

Published

on

Hatutan.com, (26 Maiu 2024), Dili—Suspeitu na’in-hitu (7) ne’ebé hadau telefóne hosi Juliana ho oan feto Nituchia iha motór leten, to’o rezulta monu iha área Praia dos Coqueiros, submete ona bá primeiru interogatóriu iha Tribunál Judisial Primeira Instánsia Dili (TJPID), iha domingu 26 maiu hodi hatán bá sira-hahalok krime.

Suspeitu na’in-hitu (7) ne’ebé hadau telefóne hosi Juliana ho oan feto Nituchia iha motór leten, to’o rezulta monu iha área Praia dos Coqueiros, submete ona bá primeiru interogatóriu iha Tribunál Judisial Primeira Instánsia Dili (TJPID), domingu (26/05/2024). Foto: Rogério Pereira Cárceres.

Suspeitu na’in-7 ne’e ho inisial RML (idade 19), VCB (idade 17), PPDI (idade 19), YGCS (idade 19), JSPHC (idade 17), RBC (idade 17), JEBP (idade 16). Hosi sira ne’e, hirak ne’ebé sai hanesan Autór prinsipál mak JEBP (idade 16), RBC (idade 17), RML (idade 19), ho VCB (idade 17).

Lee Mós: Forsa Konjunta Detein Suspeitu Na’in-rua Ne’ebé Hadau Telefone To’o Rezulta Nituchia Lakon Vida

To’o iha Tribunál Dili iha tuku 14:00 lorokraik otl ne’ebé mak asegura hosi membru DIK Nasionál ho Investigadór sira Komanadu Munisipiu Dili nian hamutuk karreta tolu.

Advertisement

Suspeitu hirak ne’e Ministériu Públiku (MP) liuhosi Prokuradór Reinato Berenahak, alega sira ho kazu krime Roubu (na’ok), iha artigu 253 hateten, sé mak iha intensaun ilejítima, hadau bá nia an ka bá ema seluk, na’ok ka uza violénsia hodi obriga hasoru ema ida atu entrega sasán movel bá nia, hakbesik hodi ameasa ho perigu bá ema nia moris ka integridade fízika ka halo oinsá ema ne’e labele satan netik an, sei kondena ho pena prizaun hosi tinan 2 to’o 10.

Nune’e mós ho kazu krime tentativa omesídiu simples ne’ebé mak previstu iha Lei Kódigu Penál Timor-Leste, Artigu 141, katak, ema ida-ne’ebé oho ema seluk sei kondena ho pena prizaun tinan 8 to’o 20.

Audiénsia Primeiru Interrogatóriu Judisial ne’e prezidente hosi Juiz Singular Afonso Carmona, Ministériu Públiku (MP) reprezenta hosi Prokuradór Reinato Berenahak, no Arguidu sira hetan asisténsia legál hosi Advogadu Ismael Assunção, Armaldo da Costa Lopes, ho Agostinho de Jesus.

 

Kronoljia Akontesimentu hosi Polísia

Advertisement

Suspeitu na’in-hitu (7) ne’ebé hadau telefóne hosi Juliana ho oan feto Nituchia iha motór leten, to’o rezulta monu iha área Praia dos Coqueiros, submete ona bá primeiru interogatóriu iha Tribunál Judisial Primeira Instánsia Dili (TJPID), domingu (26/05/2024). Foto: Rogério Pereira Cárceres.

Iha sesta (23/04/2024), iha konferénsia imprénsa Komandu Jerál PNTL liuhosi Investigadór Departamentu Investigasaun Kriminál nian, Inspetór Xefe Polisia Mouzinho Correia informa, kazu na’ok telefóne ne’ebé akontese iha loron hirak liubá.

Ema hotu hatene katak, durante loron hirak nia laran, video iha média sosiál virál, relasiona ho kazu ida ne’e. Kazu ida ne’e akontese iha Tersa (21/05), maizumenus tuku 20:00 kalan otl, iha área Pertamina, Praia dos Coqueiros nian.

Iha kazu insidente ne’e, Suspeitu na’in-haat mak kondúz motor rua hodi hadau vítima Juliana Elisabeth nia telefone.

Hosi asaun ida ne’e vítima ho nia oan Nituchia Fangidade monu, agora hetan gráve no nia oan horseik, Kinta (23/04), hakotu iis iha Hospitál Nasionál Guido Valadares. Hosi kazu ida ne’e iha kalan ne’e kedas Autóridade Intelijénsia ho Polisia Nasional Timor-Leste buka tuir kedas suspeitu sira.

“Ita konsege lokaliza no identifika ema ka suspeitu na’in-hitu mak involve iha asaun hadau telefóne. Agora, sira la’os hadau de’it telefóne, mais sira mós grupu ne’ebé durante ne’e halo operasaun hodi na’ok ema nia motor, no na’ok ema nia animál, hanesan asu,” Inspetór Xefe Polisia Mouzinho hateten liuhosi konferénsia imprénsa iha sala konferénsia Kuartel Jerál PNTL Caicoli, sesta (24/05/2024).

Suspeitu sira ne’e balun forsa konjunta duni de’it mak kaptura iha área sira hanesan Comoro, Audian ho Matadouro.

Advertisement

“Sira ne’e mak motor rua, hodi hadau vítima nia telefóne. Sira ne’e iha grupu ida ne’ebé durante ne’e hamutuk hodi halo operasaun buka asu, na’ok ema nia motor, na’ok ema nia telefóne,” komandante Mouzinho dehan.

La’os ne’e de’it, entre Suspeitu na’in-hitu ne’e mós, ida mak envolve iha kazu foin dadauk akontese hadau telefóne, ne’ebé nia na’in duni tuir, depois to’o ikus motor monu, sira konsege kaer ida, no ida halai. Ida halai ne’e mós agora iha Polísia nia liman ona.

“Relasiona ho sira nia asaun, sira nia atuasaun ne’e mós rezulta vítima mate. Ne’ebé, prosesu autópsia ohin dadersan ida ne’e hala’o hela iha mortuáriu HNGV, enkuantu ninia inan, estadu gráve, sei halo hela tratamentu iha ospitál nasionál,” nia informa.

Investigadór xefe iha DIK Nasionál ne’e esplika, objetivu hosi Autópsia ne’ebé agora la’o dadauk ona, tanba polísia presiza hatene loloos nia kauza no maneira mate ne’e, atu nune’e bele hatene katak, matebian nia monu mak mate, ka keta nia trauma hosi akontesimentu ne’e mak mate.

“Tanba ida ne’e maka importánsia hosi autópsia ne’e para atu hatene loloos nia kauza no maneira mate ne’e. Klaru katak, nia atu trauma mak mate, ka hetan pankada mak mate mós, ne’e tanba kauza hosi rezultadu ida monu ne’e. Ne’ebé, ne’e nafatin konsidera Omesídiu nian. Omesídiu Neglijénsia sira bele priénxe,” nia tenik.

Advertisement

Hatán kona-bá autos sira, DIK rasik aprezenta ona bá Ministériu Públiku (MP), investigadór xefe ne’e dehan, sira prepara hela, mais, sira sei dezenvolve, atu possivelmente bele hetan tán suspeitu balu, kuandu sira dezenvolve halo didi’ak.

Polisia mós konsidera aktus Suspeitu sira halo ne’e, tanba sira iha grupu ne’ebé mak organizadu di’ak tebes, ne’ebé durante ne’e halo operasaun iha Dili laran. Tanba ne’e, sira la’os envolve de’it bá kazu na’ok, mais sira envolve mós bá Omesídiu.

“Tanba sira nia asaun ne’e mak rezulta labarik ida mate. Polisia sei buka tuir sé sé de’it mak iha kotuk, ita sei buka tuir. Tanba ne’e mak ita sei presiza tempu, hodi dezenvolve autos ne’e halo didi’ak, no buka informasaun, para buka tuir katak, keta iha tán ema balu ne’ebé ke envolve iha kazu ida ne’e. Mais, ohin kedas autos ne’e ita aprezenta bá iha ministériu públiku,” komandante Mouzinho Correia hateten.

Hosi Suspeitu sira na’in-hitu ne’e mós, Polísia foti fila-fali mós vítima ninia telefóne ne’ebé sira hadau, inklui evidénsia motorizada ho Beat hamutuk haat, ho Xapa matrikula V.9407, T.6636, V.3532, T. 9186.

Tanba ne’e maka PNTL husu bá sidadaun sira ne’ebé mak sente katak durante ne’e sira-ninia motor lakon, atu lori dokumentu sira motor nian, bá koñese, karik sira-nian duni, bele prosesa no foti fila-fali iha kuartel komandu jerál Caicoli.

Advertisement

Suspeitu sira hetan kapturasaun hosi Forsa konjunta sira mak hanesan Polísia Nasional Timor-Leste (PNTL), Departamentu Investigasaun Kriminál (DIK), Departamentu  Informasaun Polísia, ho FALINTIL-Forsa Defeza Timor-Leste (F-FDTL) detein ona Suspeitu sira hamutuk na’in-hitu, tanba deskonfia envolve iha kazu hadau telefóne no selok motor to’o rezulta inan Juliana Elisabeth F. Soares ho oan-feto Nituchia Fangidade, tenke monu ho sira-ninian motor iha área Pantai Kelapa-Dili.

Jornalista: Rogério Pereira Cárceres

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Justisa & Krime

Ministru Justisa Sérgio Hornai Seidauk iha Dokumentu Ofisiál Desizaun TR Liberta Fujitivu Teves Jr

Published

on

Hatutan.com, (22 Juñu 2024), Díli– Mintru Justisa Sérgio de Jesus Fernandes da Costa Hornai  seidauk simu dokumentu ofisial kona-bá desizaun final Tribunál Supremu Justisa  (TSJ) ka Tribunál Rekursu (TR)  liberta total fujitivu ho nasionalidade Filipina, Arnolfo “Anie” Alipit Teves Junior (Jr).

(more…)

Kontinua Le'e

Justisa & Krime

Tribunal Rekursu Liberta Fujitivu Arnolfo Teves Jr

Published

on

Hatutan.com, (21 Juñu 2024), Díli-Tribunál Supremu Justisa ka Tribunal Rekursu (TR), Sesta, 21 Juñu 2024,  hale’u tuku 20:2 Otl, hasai Mandadu Libertasaun hodi liberta fujitivu Arnolfo “Arnie” Alipit Teves Jr hosi prizaun domisiliária.

(more…)

Kontinua Le'e

Justisa & Krime

TL Foin iha Juis 28, Prokuradór 34 ho Defensor Públiku 34

Published

on

Hatutan.com, (21  Juñu 2024), Díli- Setór justisa Timor-Leste nian kontinua enfrenta problema menus rekursu umanu iha intemu kuantidade no kualidade.

(more…)

Kontinua Le'e
Advertisement

Trending