Hatutan.com, (07 Juñu 2024), Díli-Sarani Parokia Sagradu Korasaun Jesus Becora, Díli, Sesta (07/06/2024), selebra festa Sagradu Korasaun Jesus nian liuhusi misa solenidade ne’ebé prezide husi Pe. Bernado Paivan.
Lee Mós: Sarani Katolika Selebra Festa Solenidade Kristu
![](https://www.hatutan.com/wp-content/uploads/2024/06/SACROJES-300x205.jpeg)
Selebrasaun festa Sagradu Kurasuan Jesus iha Igreja Becora, Díli, Sesta (07/06/2024). Foto/Dircia Ximenes Guterres
Iha nia omilia Saserdote ne’e fó sasin katak Jesus Kristu mak sai abut bá sarani hotu, husi Fuan Ida ne’ebe nakonu ho domin, husi Fuan Ida ne’ebe nakonu ho sakrifisiu, husi Fuan ne’ebe nakonu ho ksolok sempre lori ema ba mate ho nia finalidade ne’e sempre hasoru mate no uniku Ema ida mak saran nia an, saran nia isin tanba nia domin mai nia emar sira mak Ita Na’i Jesus Kristu.
“Se ita tuir didiak Jesus Nia istoria mate nian to’o Nia moris hias, fanun ita no soke ita-nia fuan, konvida ita hotu atu hateke bá Nia moris no Nia mate, iha buat balun ne’ebe ita labele esplika ho ita-nia razaun ka ita-nia kakutak, faktu ida ne’ebe katak ita hatudu duni bá Jesus ne’e Ema ida ne’ebe, Profeta, MestreiIda ne’ebe Nia fuan ne’e nakonu ho domin no Nia moris to’o mate ne’e hatudu dalan ida ne’ebé estraordinariu tebes,“ Padre Bernado Paivan hateten.
Maromak Nia futar liafuan konvida ema hotu-hotu atu sai fuan ida ne’ebe nakonu ho domin, fuan ida ne’ebé nakonu ho sakrifisiu, bainhira ema simu ona sakramentu batismu sai ona parte husi Jesus Kristu Nia isin no Nia ran.
“Ita hola parte iha Jesus Kristu Nia ministeriu mate no moris hias no brani haka’as an atu hatudu ita-nia fuan ida ne’ebe nakonu ho domin ba ema seluk, fuan ida ne’ebé nakonu ho sakrifisiu, no ita mós prontu atu hatudu buat ne’ebé loos bá ema seluk. Sarani lolos, ita nia belun halo sala, ita bá fó hanoin, la’ós atu dudu nia bá sala tan, hanesan agora daudaun ema na’ok telefone, ita nu’udár nia kolega ne’e fò hanoin la’ós ita mós ba tuir na’ok tan,” Amu Bernado Paivan afirma.
Partisipa iha misa eukaristia ne’e sarani pertesne bá Parókia Sagradu Korasaun Jesus Becora, saserdote sira, balun, madre no antigu alunus husi eskola Sagradu Korasaun Jesus (SACROJES, sigla portugés), mestre sira, estudante sira husi SACROJES no sira seluk tan.
Jornalista Estajiaria: Dircia Ximenes Guterres