Hatutan.com, (18 Juñu 2024), Díli—Nasaun Índia sei halo esforsu atu loke ninia embaixada hodi estabelese kooperasaun di’ak liu tán ho Timor-Leste (TL).

Embaixadór Não Rezidente India bá Timor-Leste, Sandeep Chakravorty. Foto: Média PR.

Embaixadór Não Rezidente India bá Timor-Leste, Sandeep Chakravorty hateten lia hirak ne’e hafoin hala’o enkontru kortezia ho Prezidente Repúblika (PR) José Ramos-Horta, iha Palásiu Prezidensiál Nicolau Lobato Bairru-Pité, tersa (18/06/2024).

Lee Mós:Índia Hakarak Kapasita Rekursu Umanu TL

Iha sorumutu ne’e hato’o mós karta agradesimentu hosi Primeiru-Ministru (PM) India, Narendra Modi bá Prezidente Ramos-Horta, tanba antes ne’e Prezidente Ramos-Horta hakerek karta  felisitasaun bá Primeiru-Ministru Narenda Modi hodi kongratula kona-bá ninia reeleitu.

“Ha’u lori mós karta agradesimentu hosi Primeiru-Ministru Narenda Modi bá Prezidente Repúblika José Ramos-Horta,” Sandeep Chakravorty hateten.

Diplomata ne’e hatutan, alem de karta agradesimentu, iha mós karta hosi Primeiru Ministru kona-bá loron Internasional ba Yoga.

“Kontente tebes ho Prezidente Repúblika nia aseitasaun atu sai nu’udár xefe konvidadu iha selebrasaun Loron Internasional yoga nian iha Palásiu Prezidensiál,” nia espressa.

Iha sorumutu ne’e, deskute ho Prezidente Repúblika Timor-Leste nian kona-ba rezultadu hosi sorumutuk ho Primeiru-Ministru Modi iha Janeiru bainhira Prezidente Republika vizita India, no parte rua konkorda atu halo tuir.

“Ha’u mós hato’o desizaun Governu India nian atu loke Timor-Leste nia embaixada iha Delhi no servisu atu loke embaixada sira ne’e sei iha progresu,” nia tenik.

Kona-bá relasaun bilaterál país rua di’ak loos no progressu loke embaixada iha Timor-Leste no India sei iha faze diskusaun no hein katak sei iha solusaun atu bele fasilita servisu diplomátika entre país rua.

Iha parte seluk, Prezidente Repúblika José Ramos-Horta hateten, enkontru ho Embaixadór India nian ne’e enkontru di’ak loos, Timor-Leste no India iha relasaun di’ak desde uluk kedan.

“Iha tempu badak sira haruka ona embaixadór foun no staff na’in tolu ka haat mai, sira buka agora fatin embaixada, rezidénsia buat sira ne’e,” Ramos-Horta esplika.

Ramos-Horta subliña liután, India prontu apoia Timor-Leste iha sistema dijitalizasaun kompletu liu-liu iha sistema rejistu identidade pagamentu no buat sira seluk.

Jornalista: Vito Salvadór