Hatutan.com, (20 Juñu 2024), Díli- Prezidente Repúblika (PR), José Ramos-Horta hateten tempu ona atu IX Governu Konstitusionál halo revizaun no altera lei saláriu mínimu $115.00 ba traballadór sira iha Timor-Leste.

Lee Mós: KSTL Ejize Governu Aprova Dekretu Lei Traballu ho Saláriu Mínimu $150 to’o $164

Komemorasaun loron mundiál traballadór sira-nian ho marsa, 01 fulan-Maiu 2024. Foto/Dok

Prezidente Repúblika José Ramos-Horta hateten iha kestaun barak ne’ebé ema ko’alia tanba situasaun ekonomia nasionál no mundiál, tanba folin sasán sa’e tebe-tebes entaun oinsá atu haree kona-ba saláriu traballadór sira-nian.

Problema ida mak ne’e krize ekonómiku mundiál ne’e impaktu mós ba kompañia sira tanba kustu transporte, materiál, hahán husi li’ur mai karun liu tan, tanba kustu ba kontentór sira aumenta no bainhira karrega saláriu mínimu ne’e mós iha impaktu ba emprezáriu sira.

“Kona-bá aumenta saláriu mínimu, ekonomista sira iha governu ho Banku Sentrál Timor-Leste (BCTL) mak bele halo estudu ida kle’an didi’ak oinsá aumenta saláriu mínimu,  Governu mós bele tau insentivu ba empreza sira atu sira bele moris hodi kontinua sira-nia atividade. Tanba bainhira ita ezije hasa’e saláriu mínimu empreza sira bele redús sira nia traballadór no hamosu dezempregu no buat sira ne’e mak Governu tenke lalais haree kestaun sira-ne’e,” Ramos-Horta hateten ba jornalista sira iha Palásiu Prezidensiál, Díli, Kinta (20/06/2024).

Xefe Estadu hatutan tabela saláriu mínimu $115 ne’e kleur ona, no ema barak tinan 10 ona simu vensimentu ho saláriu mínimu. Ezemplu, elementu balun hanesan profesór, seguransa sivíl ne’ebé manán $115 tinan sanulu-resin-lima ona.

Ramos-Horta iha semana ruma liubá Ospitál Nasionál Guido Valadares (HNGV)  hasoru pesoál seguransa ida no husu ba nia servisu tinan sanulu liu ona, maibé kontinua manán $115, no ida ne’e hatudu laiha polítika ne’ebé kada tinan haree atualizasaun vensimentu konforme inflasaun.

“Ba ha’u nia hanoin saláriu mínimu bele sa’e bá $150, maibé ne’e tenke Governu haree mós paralelu hamutuk ho insentivu sira ba setór privadu ne’ebé emprega ka fó servisu ba ema, atu nune’e iha proporsaun no ida ne’e mak Governu tenke haree ho matenek no kriatividade hodi aumenta saláriu mínimu,” Ramos-Horta tenik.

Primeiru-Ministru Kay Rala Xanana Gusmão rasik hateten prontu hasae saláriu minimu, maibé tenke rona mos povu. Kestaun ne’e Primeiru-Ministru hato’o hodi hatán ba pergunta husi jornalista sira bainhira husu kona-ba presiza ka lae halo alterasaun bá lei saláriu mínimu.

“Hasae saláriu minimu ba osan hira? Ha’u tenke rona ho povu, ita-boot sira reprsenta povu, hasae ba too $1,000 , $2,000 ka to’o $5,000  hasa’e mai para ha’u lori ba Konsellu Ministrus,” Primeiru-Ministru Kay Rala Xanana Gusmão hatán ba jornalista sira.

Jornalista: Vito Salvadór