Connect with us
Pakote Ahi

Nasionál

Kandidatu Komisáriu CAC Rui Pereira La’ós Personalidade Independente

Published

on

Hatutan.com, (21 Juñu 2024), Díli—Organizasaun La’ós Governu nian ne’ebé tau matan bá setór justisa, JSMP (Programa Monitorizasaun Sistema Judisiál) kestiona personalidade independente kandidatu komisáriu foun Komisaun Anti Korrupsaun (CAC, sigla portugés), tanba deskonfia Rui Pereira pertense hela bá membru partidu polítika balun ne’ebé ukun hela no atuál sai asesór jurídiku iha ministériu balun.

Lee Mós: Prezidente Repúblika Konkorda Rui Pereira bá Lidera CAC

Kandidatu Komisáriu CAC, Rui Pereira. Foto/dok.PDHJ

Liuhusi komunikadu imprensa ne’ebé Hatutan.com asesu, Sesta (21/06/2024), haktuir nomeasaun Komisáriu foun CAC potensialmente viola gravemente artigu 8 pontu 2 Lei Nú. 8/2009 kona-bá rekizitu sira elejibilidade ba Komisáriu nian ne’ebé rekere katak “kandidatu ba Komisáriu tenke rekoñesidu ninia independénsia no imparsialidade ne ́ebé ho nivel aas.

Iha loron 12 fulan-Juñu 2024, Konsellu Ministru delibera liuhosi Rezulusaun Konsellu Ministru hodi nomea  Rui Pereira nu’udár kandidatu úniku  Komisáriu CAC ho mandatu tinan haat (4) hosi tinan  2024-2028.

Advertisement

Prosesu ne’e nu’udar faze ida-ne’ebé importante tebes desde períodu Komisáriu iha mandatu datoluk nian ne’ebé termina iha 24 fulan-Janeiru 2023 ka tinan ida ho balun liuba kotuk.

Polémika no mós fallansu atu nomiea kandidatura bá kargu ne’e hahú kedas iha Governu anteriór to’o Governu atuál, husik hela vagatura (kevakuman) ida-ne’ebé atraza tinan ida resin iha istória nomeasaun bá kargu Komisáriu CAC nian.

Polémika ne’e rezulta Lei Nú. 8/2009 kona-bá CAC tenke sofre alterasaun tanba pratikamente iha difikuldade no dezafiu iha Parlamentu Nasionál (PN) hodi reuni rekizitu mínimu deputadu 49 ka (3/4) hosi deputadu 65 atu bele priense kórum bá plenáriu atu halo deliberasaun.

Tanba ne’e, PN altera lei referidu hodi fasilita prosesu eleisaun ba Komisáriu CAC nian ho Lei Nú. 1/2024 ne’ebé nia objetivu atu elemina rekizitu mínimu deputadu 49 ka (¾) hosi deputadu efetivu sira ba maioria absoluta atu bele realiza plenáriu nu’udar prevee iha artigu 7 lei referidu.

Hafoin artigu ne’e altera tiha, Konsellu Ministru nomeia filafali Rui Pereira ne’ebé antes ne’e hetan rejeisaun hosi PN. Embora laiha esplikasaun klaru tanbasá partidu opozisaun sira rejeita kandidatu ne’e, maibé fontes kredivel sira JSMP nian informa katak rejeisaun ne’e relasiona ho kandidatu ne’ebé agora dadaun Governu nomeia fali nu’udár kuadru ativu partidu ne’ebé agora kaer ukun.

Advertisement

“Ida-ne’e kestaun sériu no grave; dala-ida tan, Governu no PN falla atu kumpri obrigasaun tuir lei. Se informasaun kona-ba afiliasaun partidária Komisáriu CAC nian ne’e nu’udar faktu ida, ne’e signifika ita sei la bele mehi dook liu atu haree mudansa bá esforsu sira hodi prevene no kombate korrupsaun iha futuru,” Ana Paula Marçal, diretora ezekutiva JSMP haktuir iha komunikadu imprensa ne’e.

Atu evita no hamenus intervensaun polítika iha prosesu nomeasaun ba Komisáriu CAC nian ne’e, iha JSMP nia paraser sira antes, rekomenda bá Governu atu loke uluk konkursu públiku bá kandidatura baáKomisáriu CAC nian, nune’e, bele hili timoroan ne’ebé iha méritu, kualifikasaun, kapasidade no liuliu prienxe rekezitu legál sira, molok aprezenta bá hetan lejitimidade iha PN.

JSMP konsiente katak ezijente no urjente duni atu hetan figura ne’ebé iha tempu badak bele fila bá CAC hodi asegura funsionamentu normál tuir kompeténsia ne’ebé lei haruka. Maibé, JSMP ezije atu prosesu sira ne’e tenke tuir lei no mekanizmu ne’ebé hamenus intervensaun polítika.

Bainhira prosesu no rekizitu sira administrativa mak la tuir ona lei ka intensionalmente viola rekizitu mandatóriu sira ne’ebé lei rekere, JSMP haree ne’e mensajem ida klaru katak kompromisu atu prevene no kombate korrupsaun nu’udár retórika no promesa polítika de’it.

“Nu’udar órgaun lejisladór, deputadu sira iha PN tenke iha kapasidade atu identifika, verifika no ezamina provizaun no ezijénsia hosi diploma legál sira ne’ebé introdús hodi regula funsionamentu órgaun estadu sira no asegura kumprimentu ida rigór ba rekizitu legál sira,” Ana Paula Marçal afirma.

Advertisement

Iha artigu 8 pontu 2 Lei Nú. 8/2019 ne’ebé altera ho Lei Nú.1/2024, kontinua mantein rekizitu elejibilidade ne’ebé énfaze katak kandidatu ba Komisáriu tenke independente no imparsiál. Katak kandidatu bá Komisáriu CAC ne’e tenke totalmente livre hosi afiliasaun partidária ka asosiadu ho partidu polítika ruma no iha méritu profisionál.

Prátika di’ak internasionál sira sujere katak bainhira Komisáriu ne’ebé lidera órgaun independente ida hanesan CAC mak asosiadu ho partidu ruma sei implika;

  1. Komisaun Anti-Korrupsaun sei lakon nia kapasidade/autoridade no natureza independénsia tanba sei simu diresaun/orden hosi lider polítiku sira ne’ebé kaer ukun;
  2. Komisaun sei sai fali instrumentu no ajente Estadu hodi halo fali estorsaun (pemerasan) no korrupsaun.

Tanba ne’e, trend ka tendénsia evolusaun prátika progresiva sira kona-bá prosesu selesaun no nomeasaun Komisáriu CAC tenke asegura prinsípiu sira hanesan independénsia, imparsialidade, neutralidade, integridade no apartidaria ka la asosiadu ho partidu polítiku ruma.

JSMP fó hanoin bá PN nia koñesimentu katak CAC nu’udar órgaun polisiál espesializada ne’ebé simu knaar atu prevene no kombate korrupsaun. Iha ámbitu ida-ne’e, CAC goja ninia personalidade juridika nu’udár órgaun polisial espesializada ne’ebé independente iha ninia knaar kombate korrupsaun hanesan define iha artigu 3 pontu 2 kona-ba natureza CAC nian.

Bainhira prosesu nomeasaun mak hatudu faktu klaru kona-bá prinsípiu hirak iha leten, naturalmente sei implika papél no atuasaun CAC nian iha terrenu.

Konsidera katak elementu no natureza independente no imparsialidade nu’udár aspeitu krítiku dezempeñu no performa Komisáriu CAC nian, no ba interese atu hakotu no dúvida públiku kona-bá kandidatu atuál, JSMP rekomenda no ezije ba PN:

Advertisement
  1. Governu atu loke konkursu públiku ida ba kandidatura Komisáriu CAC nian hodi halo rekrutamentu tuir rekezitu legál sira atu bele hili timoroan ne’ebé iha méritu, kualifikasaun no kapasidade atu bele aprezenta ba iha PN hodi hetan lejitimidade liuhosi votasaun iha plenária.
  2. Se Komisáriu ne’ebé liu konkursu ne’e pratikamente envolve iha partidu polítika ruma, PN tenke estabelese mekanizmu própriu ida hodi ezije Komisáriu ne’e deklara publikamente iha plenária PN katak Komisáriu ne’e tenke hakotu nia relasaun ho partidu ne’ebé kandidatu ne’e partense ka asosiadu ba;
  3. Asegura atu halo balansu Komisáriu CAC ninia lideransa durante asume mandatu, nomeasaun ba Komisaáriu-Adjuntu sira tenke iha reprezentasaun hosi ema profisionál no independente ne’ebé laiha relasaun ho partidu ruma;
  4. Ba partidu opozisaun sira atu bele analiza no ezamina rekizitu elejibilidade nomeasaun ne’e ninia poténsia violasaun ba artigu 8 Lei nú. 8/2009 ne’ebé altera ho Lei Nú.1/2024 atu husu fiskalizasaun abstrata ba Tribunál Rekursu/Tribunál Supremu Justisa;
  5. Ba públiku iha jerál atu ativamente halo akompañamentu ba prestasaun servisu no produtividade Komisáriu designadu durante tinan dahuluk mandatu nian no sei la hatudu indikasaun progresu pozitivu ruma – bele esplora mekanizmu sira ne’ebé lei garante atu aprezenta petisaun ba orgaun soberanu sira tuir Lei Nú. 2/2024 kona-ba Direitu Ezersísiu Petisaun nian.

Governu iha Kompeténsia Própriu

Membru Parlamentu Nasionál husi  Bankada FRETILIN, David Dias Mandati. Foto/Tome da Silva

Membru Parlamentu Nasionál husi  Bankada FRETILIN, David Dias Mandati hateten Governu iha direitu no iha kompeténsia propriu atu kandidatu nia ema bá Komisáriu CAC.

“Ita lalika munafik, sé  Governu ema nian, ema sei kandidatu ema nian ema,  loos ona,” Deputadu David Mandati hateten hodi responde Hatutan.com, iha PN, Sesta (21/06/2024).

Iha fatin hanesan membru Bankada CNRT, Patrocinio Fernandes hateten ema ruma kestiona persivu ne’e normal direitu sidadaun ida nian ne’ebé  laiha komentáriu kona-bá ida-ne’e.

“Ha’u la bele fó fali komentáriu atu hateten katák ema ida-ne’e CNRT kal ae. Ninian  pontu vista kritika sira ne’e normal no  proseu la’o hela,” Deputadu Patrocinio Fernandes  hateten.

Iha  biban ne’e Prezidente Parlamentu Nasional (PPN) Maria Fernanda Lay, haktuir eleisaun bá komisáriu foun CAC sei realiza iha semana oin loron Segunda 24 fulan-Juñu tinan 2024.

“Ami tau bá semana oin, ha’u hanoin ajénda iha ona ne’ebé sei rezolve, kalma halo servisu ho nei-neik,” Maria Fernanda Lay hateten. 

Advertisement

Iha entrevista ida ho Hatutan.com iha loron i1 fulan-Marsu 2024, Kandidatu úniku (CAC), Rui Pereira hateten nia tau prioridade bá programa investigasaun kazu korrupsaun no sei garante imparsialidade CAC nian iha knaar sira.

Nia hateten, CAC la’ós instituisaun foun tanba iha 2016 to’o 2018 nia nu’udár ona adjuntu CAC bá área prevensaun ninian, tanba ne’e maka iha koñesimentu uitoan kona-bá saida maka CAC nia servisu no kompeténsia sira.

Tuir nia, servisu prinsipál CAC nian iha tolu; primeiru oinsá atu halo investigasaun bá kazu korrupsaun nian, segundu kona-bá prevensaun nian no ikus liu maka administrasaun nian.

Kandidatu Komisáriu CAC ne’e mós haktuir importante liu maka oinsá programa CAC nian iha área prevensaun nian ne’ebé sai prioridade tanba bainhira kaer ema lori bá prizaun  ne’e estadu maka sei hasai despeza boot hodi  fó han-fó hemu.  

Nu’udár Adjuntu Komisáriu CAC iha tinan 2016 to’o 2018, Rui Pereira hatene saida maka atu halo iha ne’ebá no komisáriu labele halo servisu mesak tanba sei forma nia adjuntu tolu ne’ebé sei haree ema ne’ebé maka sei eskolla para buat sira ne’e bele la’o di’ak.

Advertisement

 Jornalista Estajiária: Zita Menezes

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Ramos-Horta husu Komisaun Organizadora Vizita Papa Francisco Servisu ho Másimu

Published

on

Hatutan.com, (18 Jullu 2024), Díli- Prezidente Repúblika (PR), José Ramos-Horta husu atu komisaun organizadora vizita Papa Francisco mai Timor-Leste atu halo servisu ho másimu atu lori susesu ba vizita pastorál ne’e.

(more…)

Kontinua Le'e

Nasionál

SekJer ONU ho Xefe UNAMET Partisipa Selebrasaun Tinan XXV Konsulta Populár

Published

on

Hatutan.com, (18 Jullu 2024), Díli- Sekretáriu Jerál (Sekjer) Nasoins Unidas (ONU), António Guterres ho Xefe UNAMET (United Nation Administration Mission In East Timor), Ian Martin, konfirmandu partisipa selebrasaun tinan XXI loron Konsulta Populár, 30 Agostu 2024.

(more…)

Kontinua Le'e

Nasionál

Xanana Sei Ta’es Membru Governu sira iha Jornada Orsamentál 2025

Published

on

Hatutan.com, (18 Jullu 2024), Díli- Primeiru-Ministru (PM), Kay Rala Xanana Gusmão, sei halo avaliasaun ho rigór, identifika no ta’es planu membru Governu sira nian iha jornada orsamentál 2025.

(more…)

Kontinua Le'e
Advertisement

Trending