Connect with us
Pakote Ahi

Nasionál

Governu Seidauk Halo Pagamentu Millaun $4,89 bá CNI22 ho CLOU

Published

on

Hatutan.com, (02 Jullu 2024), Díli-Governu liuhusi Eletrisidade Timor Leste Empreza Publiku (EDTL, E.P) seidauk halo pagamentu ho montante millaun $4,49 bá empreza internasionál CNI22 ho CLOU ne’ebé hetan kontratu husi Governu atu tua-matan no hadi’a sistema eletrisidade nian.

Lee Mós: EDTL, E.P Tenke Kontrola Másimu Ligasaun Ilegál

Sistema venda pre-pagu error halo kliente sira forma narok iha edifísiu sentrál EDTL,E.P, Sabadu to’o domingu, foin lalais ne’e. Foto/Lazaro Pereira Quefi

Kompañia CNI22 ho CLOU husi Xina hetan kontratu husi Governu kada tinan millaun $4,89 maibé seidauk halo pagamentu no tuir informasaun ne’ebé Komisariu  Ezekutivu Servisu Tekniku EDTL, E.P,  Latino Jeronimo hateten, parte relevante halo hela esforsu hodi halo pagamentu tanba ne’e iha kestaun Governu.

“Uluk antes atu halo finansia ba prejetu ida ne’e liu hosi fundu emprestimu, maibé depois ita-nia Guvernu mai dehan supende lai aprovizionamentu, entaun iha prosesu verifikasaun balu tenke hanaruk uitoan. Espera, ohin submete fila fali hodi halo verifikasaun. Ha’u Hanoin semana ida ne’e se dirije ba Sekretariadu Grande Projetu hodi bele halo prosesu pagamentu. Los duni seidauk halo pagamentu koalia kona-bá sistema nian, maibé ba verifikasaun ne’e parte EDTL, E.P halo hotu ona parte relevante balu mak foin haree tuir lei molok  halo pagamentu,” Komisariu  Ezekutivu Servisu Tekniku EDTL, E.P Latino Jeronimo hateten ba jornalista sira liuhusi konferénsia imprensa iha edifísiu sentral EDTL,E.P, Caicoli, Díli, Tersa (02/07/2024).

Advertisement

Kona-bá interrupsaun ne’ebé akontese iha Sábadu kalan to’o Domingu, foin lalais, iha ligasaun mós ho pagamentu ne’ebé Governu seidauk halo ho CNI22 no CLOU, Latino Jeronimo dezmente hodi dehan ne’e laloos.

“Bainhira ita hetan defikuldades ho interupsaun ida-ne’e Prezidente EDTL, E.P no  ha’u rasik iha ne’e ho Sekretáriu Estadu Eletrisidade  no Ministru Obras Publika, inklui espertu sira informátika teknolojia (IT) nian standby  hodi buka identifikasaun no solusaun. Kompañia internasionál  CNI22 mós standby hodi fó asisténsia bá solusiona problema interrupsaun iha sistema venda pre-pagu,” Latino Jeronimo hateten.

Bá interrupsaun ne’e, nia parte lori lori EDTL, E.P nia naran hato’o deskulpa ba fallansu sira ne’e. Fallansu apuramentu tekniku no ida-ne’e se iha faze implementasaun projetu bele dehan katak projetu ne’e atinje ona 90 %.

Iha tinan kotuk fulan-Agostu, Guvernu liu husi EDTL, E.P halo lansamentu ba sistema STS 1 atualiza ba sistema foun   STS 2, depois prosesu sira ne’e la’o, hahú implentasaun iha fulan-Marsu 2024, sistema foun ne’e halo kontrator ba kompana rua hosi Xina hotu mak CNI22 ho CLOU  hahú atualizasaun hosi Liquiça laiha fallansu, depois hahú tuir mai iha teritoriu laran tomak.

Komisariu  Ezekutivu Servisu Tekniku EDTL, E.P Latino Jeronimo

“Akontesmentu komesa hahú sistema todan iha Sabadu liu ba ne’e mak  esplika ba publiku katak ita iha serve haat, depois serve rua ita back-up ne’ebe ita servisu hamutuk ho TIC depois TIC iha problema internal uitoan ne’e mak hamosu interupsaun uitoan entaun iha ne’e iha parte tolu, parte kontrator, TIC ho EDTL. E.P konkorda para ita nia sistema mai iha EDTL hodi bele halo intervensaun,” Nia esplika.

Depois problema mosu iha network ne’e katak mosu trafiku barak  no bainhira trafiku ne’e barak ligasaun ba internet mós entaun atu halo leitura ligasaun ba publiku ne’e mak lentu ka todan, maibe iha EDTL, E.P lokal nian ne’e bele funsiona hela.

Advertisement

Iha Domingu kalan parte relevantes sira hotu haree ba parte koneksaun lokal EDTL, E.P bele funsiona, maibe iha parte liur hanesan munisípiu sira no ajénsia autorizadu EDTL,E,.P nian ba fa’an pulsa eletrisidade la funsiona hotu keda maibé ho esforsu parte hotu nian iha loron tuir mai,  Segunda dadeer, hahú fila fali bá normal.

“Kona-bá kliente sira mós laiha reklamasaun to’o agora EDTL,E.P la simu keixa ruma tanba de’it ahi-mate estraga sasan elektroniku, bele iha maibe to’o oras ida ne’e la iha keixa ruma tanba ne’e atu dehan katak prejuiju ba utilizadór sira laiha liga ho interrupsaun sistema venda pre-pagu,” Latino  Jeronimo hateten.

Dezde Sábadu to’o mai Segunda (29/06-01/07/2024), sistema venda pre-pagu Eletrisidade Timor-Leste, Empreza Públiku (EDTL,E.P) monu ka down to’o mai oras ida-ne’e parte kompetente sira iha IX Governu Konstitusionál, inklui  Komisaun Ezekutivu EDTL,E.P seidauk bele fó justifikasaun bá  povu kona-bá fallansu ida-ne’e.

Dezde Sábadu kalan to’o mai Segunda ne’e, populasaun atus resin iha kapitál Díli forma naruk ho oras barak nia laran iha resintu EDTL,E.P Caicoli, Díli, inklui fatin sira ka ajénsia autorizadu  sira ne’ebé fa’an pulsa eletrisidade nian.  

Ema forma iha edifísiu sentrál EDTL,E.P hodi sosa pulsa eletrisidade. Foto/Lazaro Pereira Quefi

Balun forma to’o fali madrugada atu bele sosa pulsa pre-pagu eletrisidade nian. maibé forma naruk ho tempu barak ne’e  seidauk hetan solusaun atu bele sosa netik pulsa EDTL to’o família balun nia uma ahi tenke mate tanba pulsa mak hotu.

Kona-bá sistema venda pre-pagu EDTL,E.P nian ne’ebé falla ne’e konsidera fó prejuizu bá kliente sira no família balun loron rua ka tolu ona eletrisidade mate tanba sistema venda pre-pagu ladiak atu bele fasilita sosa pulsa eletrisidade.

Advertisement

“Ami iha liu parte Delta IV, Comoro nian, baibain  ami sosa  pulsa eletrisidade iha ajénsia autorizada iha parte Elemlio nian,  maibé tan de’it dehan sistema avalia entaun ami horiseik kedas ami mai forma iha resintu edifísiu sentrál EDTL,E.P  maibé dehan iha ne’e mós sistema  avaria,” Fausto da Silva hateten ba Hatutan.com  bainhira bainhira forma hela atu sosa pulsa pre-pagu EDTL, Segunda (01/07/2024).

Tuir nia hanoin, sistema venda pre-pagu ne’e ema mak kria tanba ne’e kuandu iha fallansu ka avaria tneke emidiamtamente fó solusaun atu la bele prezudika kliente nia ahi eletirisdade iha uma mate.

“Se bainhira ahi mate lakan hanesan ne’e se fó impaktu ba konsumidó sira entaun ami nia sasán eletróniku sira ne’ebe iha uma laran konserteza estraga hotu tanba sistema aat ami labele asesu ba pulsa. Ha’u hanesan povu baibain husu ba entidade Estadu liuliu ba ministériu kompetente atu buka solusaun emidiata nun’e bele garante povu asesu ba eletrisidade ho di’ak,” Fausto da Silva hateten.

Iha fatin hanesan estudante Universidade Nasional Oriental Timor – Lorosa’e (UNITAL), Jacinto Lopez Fernandes hateten iha Becora tomak ajénsia autorizada  fa’an pulsa eletrisidade ne’e error hotu ,nune’e kuaze la asesu eletrisidade durante loron rua ho balu ona tanba ne’e mak situsaun obriga entaun tenke forma narok iha oras barka nia larna iha resintu sentral EDTL,E.P atu bele sosa pulsa pre-pagu eletrisidade nian.

“Ha’u nia sentimentu kona-ba pulsa eletrisidade iha fatin sira ajénsia autorizadu ne’e error ne’e defikulta tebes bá ami atu hetan ahi eletrisidade bá ami nia nesesidade. Ohin loron, bee-moos mos tneke uza eletrisidade, tein mós uza eletrisidade  no buat hotu ita uza eletrisidade tanba ita iha ona mundu dijitál. Agora  sistema venda pre-pagu eletrisidade  la di’ak hanesan ne’e, ami sofre nia konsekuénsia,” Jacinto Lopez Fernandes hateten .

Advertisement

Hanesan estudante husu ba nai-ulun sira atu hadi’a fali sistema error ne’e ho dignu uitoan  atu nune’e populasaun sira asesu bá eletrisidade ho seguru labele asesu ba semana ida de’it error fila fali no mós komunidade sira labele la’o dook tan hanesan  ne’e tanba de’it atu sosa  pulsa pre-pagu eletrisidade.

KHUNTO Preokupa ho Sistema Venda Pre-Pagu EDTL Error

Membru PN hosi Bankada KHUNTO, Luis Roberto. Foto/Zita Menezes.

Parlamentu Nasionál liuhosi deklarasaun polítika Bankada KHUNTO, Tersa (02/07/2024), preokupa ho sistema token pulsa eletrisidade ne’ebé durante iha tinan ida-ne’e laran sempre error nune’e rezulta konsumidór sira tenke forma naruk hodi bele sosa pulsa eletrisidade.

“Horisehik EDTL.E.P aviza bá públiku katak sistema fa’an pulsa/Token enerjia normaliza hikas ona, maibé realidade ne’ebé ita hotu akompaña no enfrenta direita iha postu venda sira iha territóriu tomak sei kontinua error hodi difficult bá kliénte sira susa pulsa eletrisidade,”membru PN husi Bankada KHUNTO,  Luis Roberto haktuir  deklarasaun polítika Bankada KHUNTO iha Plenária PN.

Bankada KHUNTO levanta iha plenária  hodi husu Ministériu relevante atravesa Vise-Ministru Asuntu Parlamentár Adérito Hugo da Costa atu identifika lalais ninia kauza hodi bele normaliza hikas sistema refere.

Vise-Ministru Asuntu Parlamentár Adérito Hugo da Costa hateten nian parte sei envia asuntu ne’e bá Ministériu relevante no EDTL, E.P hodi buka solusaun.

Advertisement

Aldeia Lubuk  Seidauk Asesu Eletrisidade

Deputadu Luis Roberto informa mós katak  aldeia lubuk ida mak seidauk asesu bá eletrisidade maské Timor-Leste nia ukun aan tinan 20 -liu ona, nune’e reprezentante povu iha PN husu Governu atu haree situasaun ida-ne’e.

Tuir Bankada KHUNTO nia haree katak suku no aldeia balun seidauk sente ukun an kompletamente, aldeia neen (6) husi Suku Mahina1 no Mahina2, Munisípiu Lautem, to’o agora seidauk iha eletrisidade no sira sunu de’it kami.

“Iha tinan 2015 liu ba autoridade lokál hamutuk ho veteranu sir submete ona proposta ba Ministériu Obras Públikas no Vise Ministru Eletrisidade. Kompañia mobiliza ona material balun, hanesan ai-riin eletrisidade nian, maibé to’o momentu ne’e seidauk iha resposta atu fasilita komunidade asesu ba eletrisidade,” Deputadu Luis Roberto hateten.

Iha Sorin seluk Deputada Sancha Tilman husi Bankada PD informasaun nia  simu informasaun husi Xefe Suku Maulau ho Xefe Suku Manetu’u, Postu Administrativu Maubisse, Munisípiu Ainaro, katak iha aldeia hitu(7) mak durante ne’e la asesu ba eletrisidade.

Advertisement

“Husu Governu  bele tau konsiderasaun liu-liu iha planu orsamentu jerál ba 2025 nian atu bele instala eletrisidade hodi aldeia ho suku sira ne’ebé seidauk asesu eletrisidade,” Nia hateten.

Vise-Ministru Asuntu Parlamentár Adérito Hugo da Costa informa, nia parte sei hato’o kestaun ida-ne’e bá ministériu relevante sira hodi bele buka solusaun bá preokupasaun povu nian.

Jornalista Estajiariu: Lazaro Pereira Quefi/Zita Menezes/Dircia Ximenes Guterres

 

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Konsellu Ministru Fó Podér Tomak bá Vise-PM Francisco Kalbuadi Lay Asina Akordu Marrakexe

Published

on

Hatutan.com, (17 Jullu 2024), Díli—Sorumutuk Konsellu Ministru sira-nian iha Palásiu Governu, Kuarta (17/07/2024), delibera hodi fó poder tomak bá Vise-Primeiru-Ministru, Francisco Kalbuadi Lay, hodi asina instrumentu aseitasaun bá protokolu Adezaun Timor-Leste bá Akordu Marrakexe ne’ebé estabelese iha Organizasaun Mundiál Komérsiu (OMK) iha loron 22 fulan-Jullu ne’e iha Jenebra.

(more…)

Kontinua Le'e

Nasionál

Vizita Papa Francisco, Preparasaun iha Tasi-Tolu Atinje 80%

Published

on

Hatutan.com, (17 Jullu 2024), Díli—Preparasaun fíziku inklui konstrusaun bá altar misa ho Papa Francisco iha Tasi-tolu atinje ona 80%.

(more…)

Kontinua Le'e

Nasionál

Ramos-Horta husu Movimentu Timor Avante Konsolida Pás no Fraternidade

Published

on

Hatutan.com, (17 Jullu 2024), Díli- Prezidente Repúblika (PR), José Ramos-Horta husu ba Movimentu Timor Avante (MOTIVA) atu konsolida pás no fraternidade iha sosiedade nia-leet.

(more…)

Kontinua Le'e
Advertisement

Trending