Hatutan.com, (15 Jullu 2024), Díli- Repúblika Demokrátika Timor-Leste (RDTL) ho Repúblika Populár Xina halo preparasaun bá haluan kooperasaun iha área ekonómiku, dijitalizasaun no esensiál liu mak agrikultura no edukasaun.

Lee Mós: Xína Kontinua Apoia TL iha Área Espesífiku Sira

PM Xanana Gusmão akompaña husi Vise-Primeiru-Ministru no Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay halo enkontru ho Embaixadora Xina mai Timor-Leste, Wang Wenli, Segunda (15/07/2024). Foto/Elio dos Santos da Costa

Reuniaun bá hakle’an kooperasaun ne’ebé hsla’o iha edifísiu Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente iha Farol, Díli, Segunda (15/07/2024)  lidera husi Primeiru-Ministru Kay Rala Xanana Gusmão halo ho Embaixadora Xina mai Timor-Leste, Wang Wenli akompaña husi Vise-Primeiru-Ministru no Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay, iha ámbitu preparasaun vizita Prezidente Repúblika José Ramos-Horta ba Nasaun Repúblika Populár Xina iha loron 27 fulan-Jullu, tinan ne’e.

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay  hateten hamutuk ho Primeiru-Ministru Kay Rala Xanana Gusmão, simu vizita husi embaixadóra Repúblika Xina Wang Wenli nian iha Timor-Leste hodi diskute preparasaun sira ba vizita Prezidente Repúblika, José Ramos-Horta nian bá Xina atu kontinua hakle’an no hametin liután kooperasaun sira iha area sira ne’ebé iha.

Nia afirma ho Prezidente Repúblika José Ramos-Horta nia vizita ba Xina iha tempu semana rua mai, tanba ne’e mak haree preparasaun sira, liu-liu iha área kooperasaun sira ne’ebé atu hakle’an entre Xina no Timor-Leste.

“Pontu importante ne’ebé ohin diskute haree liubá kooperasaun ihaáarea ekonómiku, dijitalizasaun no ida esensiál liu mak Agrikultura ho edukasaun,” Francisco Kalbuadi Lay bá jornalista sira.

Nia hatutan ohin mos Embaixadóra Cina Wang Wenli relata hela bá Primeiru-Ministru Kay Rala Xanana, atu oinsá bá oin Governu Timor-Leste no Xina sei haree estuda oportunidade sira, iha área saida de’it mak Xina bele ajuda no Timor-Leste bele koopera hamutuk, liu-liu benefísiu bá parte rua.

Governu iha Kompromisu Hasae Produsaun Rai-Laran no Redús Importasaun

Vise-Primeiru-Ministru no Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay. Foto/Elio dos Santos da Costa

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay hateten, Governu iha kompromisu atu hasae produsaun produtu lokal nune’e bele redús produtu importasaun.

“Produtu lokal ne’e hakarak ka lakohi tenke aumenta, ne’e  maka área agrikultura importante tebes tanba ne’e  haree bá oin hanusá mak aumenta produtu lokal, no hasa’e kreximentu ekonómiku.” Francisco Kalbuadi Lay hateten.

Nia  hatutan produtu importasaun ne’ebé barak liu tama Nusa Tenggara Timur (NTT), mak material konstrusaun hanesan semente no kona-bá produtu lokal hanesan Tomate no sira seluk laiha no kona-ba foos agora stock sei sufisiente iha armazén Governu nian atu bele responde nesesidade merkadu nasionál.

Jornalista: Vito Salvadór