Hatutan.com, (17 Jullu 2024), Díli- Fidelis Leite Magalhães no Mericio Juvenál dos Reis Akara to’o agora la submete karta rezignasaun ba Partidu Libertasaun Populár (PLP) no sira rejeita informasaun ne’ebé espalla dehan sira atu  harii partidu seluk.

Lee Mós: Ramos-Horta husu Movimentu Timor Avante Konsolida Pás no Fraternidade

Fidelis Leite Magalhães ho Mericio Juvenál dos Reis Akara. Foto/Espesiál

Fidelis Leite Magalhães ne’ebé asume kargu nu’udar VI Vise Prezidente PLP rejeita buatu no informasaun ne’ebé hateten nia parte sai ona husi PLP no situasaun hanesan mai mós husi IV Konsellu Politika Nasionál PLP, Mericio Juvenál dos Reis Akara.

“To’o agora ha’u seidauk hatama karta bá partidu, bá lideransa partidu no sira seluk. Ha’u to’o agora seidauk, maibé konversa hotu ne’ebé ha’u halo ho Prezidente Partidu sempre halo ho nakloke, ho respeitu ne’ebé profundu, amizade, hakru’uk no sempre sente amizade no apresiasaun ba relasaun di’ak ne’ebé iha,” Fidelis Leite Magalhães hateten ba jornalista sira iha Palásiu Nobre, Lahane, Kuarta (17/07/2024).

Fidelis Leite Magalhães subliña liután katak to’o agora la hakerek karta ruma ba partidu PLP no iha momentu ida-ne’e la preokupa ho asuntu kona-bá partidu no ho rumor sira  kona-bá rezignasaun.

Rejeita Harii Partidu Seluk

Atuál Koordenadór Movimentu Timor Avante (MOTIVA), Fidelis Leite Magalhães hateten ho ezisténsia movimentu MOTIVA nian la’ós atu harii partidu foun ka harii partidu seluk, maibé halibur foin-sa’e sira husi partidu oin-oin atu hamutuk tau vizaun ida bá futuru.

“Objetivu ita halibur foin-sa’e sira ne’e la’ós atu hari partidu foun. Movimentu ne’e la’ós partidu,” Fidelis Leite Magalhães afirma.

Mericio Juvenál dos Reis Akara fundamenta katak saida mak  Ministru Prezidensia Konsellu Ministru iha VIII Governu Konstitusionál, Fidelis Leite Magalhães ko’alia, ida-ne’e mak sira nain-rua nia pozisaun.

Jornalista: Vito Salvadór