Hatutan.com, (17 Jullu 2024), Díli– Ministru Transporte no Komunikasaun (MTK), Miguel Marques Manitelu, konfirma  Governu seidauk iha desizaun kona-bá opersaun aviaun komersiál AirAsia-Indonézia husi Denpasar-Bali mai Díli, Timor-Leste no husi Díli bá Denspasar, Bali-Indonézia.

Lee Mós: Prezidente Repúblika Husu Governu Tane Aero Dili no La Nesesita Atu AirAsia Semo Denpasar-Dili

Ministru Transporte no Komunikasaun (MTK), Miguel Marques Manitelu. Foto/Dok.Tome da Silva

Ministru Miguel Manitelu, afirma katák prosesu operasaun aviaun komersiál husi nasaun ida bá nasaun seluk la’ós hanesan bá sosa brinkedu sira iha loja, osan iha to’o bá sasan mai. Tanba ne’e prosesu ne’e sei la’o no estadu ka Governu Timor-Leste sei tetu asepeitu hotu molok foti desizaun finál.

“Ita haree hanesan públiku sira mós haree iha pro no kontra ne’e buat normal, mas hein to’o momentu ida sei foti desizaun, la’ós agora, ema atu sosa aviaun ema lori aviaun mai ne’e prosesu ne’e sei iha, depois la’ós Ministru mak foti desizaun, Autoridade Aviasaun Sivíl mak sei haree sasan ne’e, no Autoridade Aviasaun Sivíl ne’e tutela bá ministériu, mas la’ós ha’u ministru  mak foti desizaun,” Ministru Miguel Manitelu hateten  bá jornalista sira iha Palàsiu Governu hafoin partisipa  Konsellu Ministru sira-nian, Kuarta (17/07/2024).

Nia akresenta tán públiku rasik haree no média rasik entrevista ho ema barak tantu na’in bá aviaun sira ne’e, karik mós bá ema ne’ebé mak atu hatama aviaun ne’e mai, iha preokupasaun oin-oin nune’e  Governu sei haree no tetu. Ho hanoin ida katak sei haree prosesu ne’e mais  la’ós agora, la’ós semana oin no depois sei iha diskusaun hodi tetu bá buat hotu-hotu.

Promosaun tiketi aviaun AirAsia ho folin $50.00 kada vou Denpasar-Dili ne’e laloos. Foto/Repro Facebook

“Ha’u husu sira atu fó paraser bá ha’u, no ha’u seidauk foti desizaun, atu halo opersaun AirAsia nian ne’e. Imi labele kaer ema ida ko’alia depois mai obriga estadu atu foti desizaun, bele depois fulan-Setembru, bele mós antes fulan-Setembru ne’ebé ha’u hanoin desizaun ne’e iha  Governu. Ne’ebé ha’u hateten ona kualkér desizaun ne’e tetu bá buat hotu, Timoroan hotu di’ak bá ita-nia rai, di’ak bá ita-nia povu di’ak bá ita-nia investór Timoroan sira, nune’e ita tenke haree bá sasan sira ne’e hotu,” Miguel Manitelu hateten.

Husi sorin seluk, jornalista sira mós halo kontaktu ho fontes sira AirAsia nian iha Díli hateten sira seidauk bele fó informasaun ruma kona-bá operasaun AirAsia Indonézia mai Dili hodi hein desizaun husi Governu  kona-ba sira-nia proposta operasaun aviaun komersiál AirAsia-Indonézia mai Timor-Leste.

Kona-bá presu trikete AirAsia ne’ebé agora viral iha Facebook katak AirAsia sei fa’an tiketi ho folin $50.00 kada vou Denpasar-Díli, fontes ne’e hateten, informasaun ne’e laloos no la’ós parte AirAsia nian mak pronunsia.  

Jornalista Estajiária: Zita Menezes