Hatutan.com, (18 Jullu 2024), Díli- Prezidente Repúblika (PR), José Ramos-Horta husu atu komisaun organizadora vizita Papa Francisco mai Timor-Leste atu halo servisu ho másimu atu lori susesu ba vizita pastorál ne’e.

Lee Mós: Vizita Papa Francisco, Preparasaun iha Tasi-Tolu Atinje 80%

Komisaun Organizadora Vizita Papa Francisco nian relata servisu ba Prezidente Repúblika, José Ramos-Horta, Kinta (18/07/2024). Foto/Média MAE

Prezidente Repúblika José Ramos-Horta hato’o deklarasaun ne’e hafoin hala’o sorumutuk ho komisaun organizadora ba vizita Papa Francisco ne’ebé lidera husi Koordenadór Jerál Tomas do Rosário Cabral, iha Palásiu Prezidensiál, Kinta (18/07/2024).

“Prezidente Repúblika José Ramos-Horta nia rekomendasaun mak atividade ne’e tenke susesu, ema hotu-hotu tenke kontribui ba atividade ne’e tenke susesu,” Tomas do Rosário Cabral haktuir.

Nia hatutan ho preparasaun sira ne’e maka, ohin Prezidente Repúblika bolu komisaun organizadora  atu relata pontu situasaun preparativus ba vizita amu Papa Francisco nian.

Komisaun ne’e mós  horisehik halo sorumutuk ho Parlamentu Nasionál no kontinua ohin ho  Xefe Estadu hodi relata saida mak komisaun prepara relasiona ho vizita Papa nian iha Tasi Tolu, CCD, Katedral inklui mós enkontru bilaterál Palásiu Prezidénsia Repúblika.

Komisaun Organizadora ne’e kompostu husi Governu no igreja liu husi CET hamutuk ho Komandu Polísia Nasionál Timor-Leste, no instituisaun estadu sira seluk, iha mós Sekretáriu Estadu Komunikasaun Sosiál (SEKOMS) hahú loke akreditasaun bá kobertura média no jornalista sira nian relativa  ho vizita amu Papa Francisco nian.

Preparasaun fíziku atinje 80%, falta fulan ida to’o Setembru sasán hotu iha Dili, bele organiza di’ak liu tan ba vizita Papa nian, importante liu mak média sira bele hetan akreditasaun kartaun atu bele iha asesu halo kobertura.

Munisípiu sira organiza malu atu mai Dili, osan governu nasionál haruka ba hotu ona iha ne’ebá kondisaun governu apoiu Igreja mobilizasaun ba preparativus.

Iha sorumutuk ho Prezidente Repúblika ne’e Prezidente Autoridade Munisipál sira mos informa kona-ba komunidade sira nia entuziasma atu partisipa iha vizita Papa Francisco nian, liu-liu iha misa ne’ebé sei halo iha Tasi Tolu. Tuir ajenda vizita Papa Francisco nian mai iha Timor-Leste iha loron 09 to’o loron 11 fulan-Setembru 2024.

Jornalista: Vito Salvadór