Hatutan.com, (16 Setembru 2024), Díli–Forum Komunikasaun Perempuan Timor Leste ( FOKUPERS) submete ona karta lamentasaun ba Ministru Transporte no Komunikasaun, Miguel Marques Gonçalves Manitelu, liga ho kazu asédiu seksuál ne’ebé deskonfia akontese iha ministériu refere.

Lee Mós: Kazu Asédiu Seksuál, “Apa-Boot” Prontu Bá Hatán iha Tribunál

Iluastrasaun kampaña kontra asédiu seksuál husi UN Women

Diretóra Ezekutiva FOKUPERS, Domingas Afonso Amaral hateten antes ne’e FOKUPERS simu duni keixa relasiona. ho kazu asédiu seksuál ne’ebé deskonfia envolve husi diretór ezekutivu ida iha instituisaun Estadu ne’ebé tutela administrativamente bá MTK.

“Ho keixa ne’ebé mak iha FOKUPERS halo ona karta ba Ministru Miguel Manitelu  tanba instituisaun relevante tutela ba iha ministériu refere. Ami husu ministru atu ho seriedade haree nune’e bele fó xamada ka  sansaun disiplinár ba pesoál ne’ebé envolve no mós atu hare ba nia promosaun karreira. Ida-ne’e mak esforsu ne’ebé FOKUPERS halo,” Diretóra Ezekutiva FOKUPERS, Domingas Afonso Amaral bá Hatutan.com, iha kna’ar fatin, Farol, Sesta foin lalais ne’e.

Daudaun ne’e FOKUPERS hein hela resposta no medida saida mak Ministru Miguel Manitelu  atu fó resposta bá karta FOKUPERS nian.

Iha parte seluk FOKUPERS mós enfrenta dezafiu mak hanesan  instituisaun ne’ebé Diretór Ezekutivu  ne’ebé deskonfia komete asédiu seksuál ne’e hanesan empreza públiku tanba ne’e  lei  iha Funsaun Públika la vingkulativu  bá sira ka sansaun disiplinár iha lei Funsaun Públika nian labele aplika.

Liga ho asaun husi CFP hodi loke investigasaun iha instituisaun pesoál diretor ezekutivu ne’e, FEKUPERS apresia ho esforsu husi MTK,  maibé FOKUPERS  konsidera  sei iha dezafiu tanba  pozisaun  suspeitu ka DE ne’e mai husi nomeasaun politika, tanba ne’e  FOKUPERS  deklara katak ne’e hanesan dezafiu boot ida bainhira atu prosesa ba ministériu públiku ka aplika lei funsaun públiku nian.

Antes ne’e vítima esklarese katak iha duni intimidasaun ka presaun maibé hafoin hetan akompañamentu husi nia advogadu, ho akonselamentu husi FOKUPERS rasik  ho nune’e konsege halakon ona problema hirak ne’e.

Bá kazu ne’e, diretór ezekutivu ho inisiál “Apa-boot” hasai ona deklarasaun katak parte sé de’it mak sente vítima husi nia aktu ne’ebé konsidera halo asédiu seksuál hasoru nia bele lori prosesu ne’e ba Tribunál atu bele hetan nia verasidade no lia-loos.

Ministu Miguel Manitelu rasik deklara ona katak nia bolu ona parte rua; kompostu husi diretór ezekutivu ne’e ho nia funsionária ida ne’ebé deklara vitíma bá kazu asédiu seksuál ne’e hodi rona sira no prosesu ne’e presiza la’o tuir Lei ne’ebé vigora. 

Jornalista : Leopoldina de Carvalho