Hatutan.com, (01 Outubru 2024), Díli—Ministru Ensinu Superiór, Siénsia no Kultura (MESSK), José Honório da Costa Pereira Jerónimo, husu bá bolseiru na’in-70 ne’ebé hetan oportunidade atu kontinua estuda iha Indonézia tenke estuda makas atu fila mai dezenvolve Timor-Leste iha futuru.

Bolseiru Timoroan sira ne’ebé sei aranka bá kontinua sira-nia estudu iha Indonézia. Foto/Elio dos Santos da Costa

Ministru Ensinu  Superiór Siénsia no Kultura, José Honório da Costa Pereira Jerónimo lori Governu nia naran agradese bá Governu Repúblika Indonézia tanba liu-hosi Ministériu Finansas Indonézia nian halo rekrutamentu bá bolseiru Timoroan sira hamutuk na’in-70 atu bá kontinua estudu iha Indonézia.

Bolseiru hirak ne’e sei estuda iha área tolu importante mak hanesan estudu kontabilidade, jestaun no agrikultura.

“Bá bolseiru sira tenke aproveita hodi estuda ho di’ak, uza tempu ho di’ak atu bele enkoraza imi nia-an hodi aprende atu buka hatene di’ak liu-tán la’ós de’it iha teoria maibé iha prátika tanba edukasaun mak muda ema nia hanoin depois mak ema muda mundu,” Ministru ne’e hameno iha Gedung Pusat Budaya Indonésia, Díli,Ttersa (01/10/2024).

Iha fatin hanesan Embaixadór Repúblika Indonézia iha Timor-Leste, Okto Dorinus Manik hateten, bolseiru hirak ne’e sei hala’o estudu iha universidade sira ne’ebé di’ak liu iha Indonézia hanesan Universitas Gaja Mada, Akademi Pertanian no seluk tán.

“Ami hala’o selesaun ho rigór bá ita-nia maluk sira hosi Timor-Leste. Ami hakarak atu apoia Timor-Leste liu hosi kapasitasaun bá rekursu umanu ne’ebé bele dezenvolve nasaun ne’e iha futuru,” Embaixadór Okto Dorinus Manik hateten.

Bolseiru na’in-70 ne’e sei hala’o hela tratamentu bá sira nia viza estudu no bainhira kompleta ona maka sira sei arranka bá Indonézia.

 Jornalista Estajiáriu: Lázaro Pereira Quefi