Hatutan.com, (21 Outubru 2024), Díli—Ministériu Agrikultura Pekuária, Peska no Floresta (MAPPF) Servisu simu mákina sira hamutuk item 54 ne’ebé oferese hosi Governu Austrália liu hosi Programa To’os Bá Moris Di’ak (TOMAK).

Ministru Agrikultura Pekuária, Peska no Floresta, Marcos da Cruz simu mákina sira hamutuk item 54 ne’ebé oferese hosi Governu Austrália liu hosi Programa To’os Bá Moris Di’ak (TOMAK) iha edifisiu MAPPF Comoro, Díli (21/10/2024). Foto: Lázaro Pereira Quefi

Ministru Agrikultura Pekuária, Peska no Floresta, Marcos da Cruz hateten, Programa TOMAK ne’e inisia hosi Governu Austrália hodi apoia komunidade iha área rurál no hasa’e reziliénsia bá klima no hadi’a kapasidade agrikultura nian.

Lee Mós: MAPPF Prioritiza Dezenvolvimentu Infraestrutura iha Setór Agríkola

“Sira rasik mak finansia, nune’e sei estabelese bá komunidade iha munisipiu tolu hanesan Baucau, Bobonaro no Viqueque,” Marcos da Cruz Marcos da Cruz hateten iha edifisiu MAPPF  Comoro, Díli (21/10/2024).

Ministru ne’e informa, Governu Timor-Letse (TL) servisu hamutuk ho Governu Austrália la’ós kleur ona no antes ne’e apoia bá produsaun fini hanesan hare, batar no fini oioin, agora sira mai tán ho programa TOMAK apoia liu bá produsaun agrikola hanesan modo liu-liu hodi rezolve problema mudansa klimátika nian, buka adapta bá mudansa ne’ebé akontese iha TL.

Nia sita ekipamentu ne’ebé oferese hamutuk item 54 mak hanesan tratór, mini-tiler, tanki bee, solar panel, mákina ko’a duut, bidon hodi hoban ai-tahan atu halo adubu orgániku been no sira seluk tán tanba sira mos aliña ho TL nia programa katak bá oin atu dezenvolve agrikultura orgánika.

Mákina sira ne’e sei distribui bá munisipiu tolu mak hanesan Bobonaro, Baucau ho Viqueque ne’ebé sai hanesan área bá programa TOMAK nian.

Iha fatin hanesan Deputy Embaixadór Austrália, Edward Wilkinson hateten To’os Ba Moris Di’ak (TOMAK) ne’e Governu Austrália nia programa bá tinan 10, iha área agrikultura, sensível bá nutrisaun iha Munisipiu Baucau, Bobonaro no Viqueque.

Programa ne’e ativamente apoia komunidade rurál sira ho hasa’e sira-nia reziliénsia bá klima hodi hadi’a sira nia kapasidade agrikultura nian.

TOMAK sei halo kolabora ho MAPPF atu estabelese Sentru Aprendizazen Agrikultura Matenek no Sensivel bá Klimátika iha Baucau, Bobonaro, Viqueque no iha MAPFF nia Sentru Formasaun Agrikultura iha Corluli no Natarbora.

Sentru sira ne’e sei promove tékniku oioin, hahú hosi Teknolojia Agrikultura Rai-Lolon to’o konservasaun Agrikola (KA), jestaun no konservasaun bee, inklui halibur ka kolleita bee.

Fini sira ne’ebé reziliente bá klima sei koko no hirak ne’ebé susesu sei promove bá to’os-na’in sira iha komunidade.

Sentru ne’e sei sai fatin bá to’os-na’in no extensionista sira atu aprende no mós fatin bá estudante Universitáriu sira atu halo peskiza.

Hanesan parte ida hosi kolaborasaun, TOMAK kontribui besik $46,000 liu-hosi materiál sira hodi apoia estabelesimentu sentru sira nian ho MAPPF.

TOMAK sei kontinua servisu hamutuk ho MAPPF nia Departamentu Estensaun liuhosi fornesimentu koñesimentu tékniku, abilidade no esperiénsia bá to’os-na’in sira iha Timor-Leste.

Jornalista Estajiáriu: Lázaro Pereira Quefi