Hatutan.com, (25 Outubru 2024), Díli- Komisaun Nasionál Desportu (KND) kontinua monitoriza kualkér atividade kongresu Federasaun Futeból Timor-Leste (FFTL) nian no rekomenda ba governu atu la rekoñese bainhira FFTL kontinua viola ninia estatutu no estatutu asosiasaun futebol munisipál sira nian, inklui husu mós atu governu atu provisoriamente hapara kualkér apoiu ba FFTL.

Lee Mós: Governu Fó Hanoin bá FFTL Atu Kuidadu ho Falsifikasaun Idade Jogadór no Husu Suspende SekJen Gregorio Correia

KND hato’o pozisaun ne’e liu husi reuniaun estra- ordináriu ne’ebé hala’o iha salaun Magna Ministériu Juventude, Desportu, Arte no Kultura (MJDAC, sigla portugés), Sesta (25/10/2024) ho agenda uniku kona-bá falsifikasaun dokumentu ba jogadór selesaun nasional na’in-rua, nune’e mós halo análize ba polémika kongresu FFTL nian.

Sekretaria Ezekutivu Komisaun Nasionál Desportu (KND). Foto/Elio dos Santos da Costa

Reuniaun estra-ordináriu ne’e haree mos ba karta notifikasaun husi Ministru Juventude, Desportu, Arte no Kultura, asuntu nota kona-bá pena AFC ba jogadór Jaimito Soares no kongresu FFTL 2024 ne’ebé la kumpre estatutu FFTL.

Sekretáriu Ezekutivu KND, Cesarino da Silva ba jornalista sira hafoin remata reuniaun estra-ordináriu ne’e hateten KND husu ba FFTL atu halo investigasaun interna hodi identifika entidade ne’ebé envolve iha kazu falsifikasaun dokumentu (pasaporte) ba jogadór na’in-rua nune’e bele hetan mós sansaun hosi FFTL

KND mós husu ba ministériu relevante hodi halo investigasaun kle’an ba kazu falsifikasaun dokumentu hodi hetan pasaporte ba jogadór Jaimito Antonio da Costa Soares no Antonio da Costa Soares Moniz.

“Apela ho rigór ba FFTL hodi asume responsabilidade administrativa  hodi selu lalais multa ne’ebé jogador na’in rua hetan no labele husik jogadór sira sai nafatin vítima ba inkapasidade jestór FFTL nian,” Cesarino da Silva hateten.

Sekretáriu Ezekutivu ne’e hatutan KND mós halo análize kle’an ba polémika organizasaun FFTL nian tuir Lei baze Desportu, artigu 16 no Dekretu Lei nu. 60/2022 kona-bá kompeténsia Komisaun Nasional Desportu.

KND kaer nafatin ba independénsia organizasaun desportiva sira nian hanesan FFTL, maka KND husu ba FFTL atu kumpre nafatin estatutu nu’udár regra federasaun ba iha realizasaun kongresu tantu ba asosiasaun munisipiu no nasional.

Husu FFTL atu servisu hamutuk ho KND, CDTL no CONTL atu kria komisaun independente hodi normaliza tia problema sira hotu iha FFTL hodi rezolve problema ne’ebe akontese iha FFTL

KND rekomenda ba Governu hodi husu ba FIFA no AFC atu hamutuk ho governu kria komisaun independente ida, atu tau matan hodi realiza kongresu FFTL nian, nune’e bele hetan hikas kredibilidade ba membru sira no komunidade timorense.

FFTL sei hili komité independente

Prezidente Interinu FFTL, Tenente Jenerál Domingos Raul “Falur Rate Laek” ba jornalista sira iha sede FFTL, Díli, hateten komité ezekutivu FFTL enkontru atu halo aprovasaun ba kongresu estra-ordináriu FFTL nian ba hili komité eleitorál, komité disiplinár no komité Appeal inklui Unidade Auditoria & Konformidade ne’ebé sei realiza iha Sábadu (26/10/2024), atu responde lalais ezijénsia husi FIFA, AFC no AFF inklui ho komunidade sira nia preokupasaun ba iha FFTL.

“Iha kongresu aban ne’e atu kria komisaun independente sira para halo prosesu sira tuir mai ne’e nian, ho mos aprova estatutu no mos rejimentu no dokumentu sira ne’e para tuir mai halo prosesu dezenvolvimentu FFTL nian.  Kongresu ida ne’e mos realmenta atu hadi prosesu sira iha FFTL laran tuir ezijénsia sira husi FIFA no AFC nian para ema labele hare bebeik FFTL nia prosesu administrasaun no jestaun ne’e iha problema,” Raul “Falur Rate Laek” hateten.

Kona-bá kongresu estra-ordináriu FFTL nian ba hili órgaun ezekutivu FFTL foun ba mandatu períodu ida tuir estatuta Federasaun nian sei anúnsiu ofisiálmente hafoin  eleisaun ba órgaun independente sira FFTL nian.

Jornalista: Vito Salvadór