Hatutan.com, (28 Outubru 2024), Oé-Cusse– Profesór na’in-ualu (8) ne’ebé hala’o knar iha  Eskola Paralelu Sekundáriu Jerál (ESG, sigla portugés) Puin Beno, Aldeia Pune, Suku Usi-tasae, Postu Administrativu Oé-silo, Rejiaun Administrativu Espesiál Oé-Cusse Ambeno (RAEOA) laiha fatin bá edifísiu tanba ne’e sira utiliza de’it aula aprendizajen eskola nian hodi sai mós hanesan edifísiu hodi halo enkontru ka servisu administrasaun eskola nian.

 Eskola ne’e harii dezde loron 22 fulan-Janeiru 2018 to’o agora akomula estudante hamutuk 240 no profesór na’in-ualu,  informa ona bá Governu, liuliu Ministériu Edukasaun Rejionál Oé-Cusse, maibé  to’o agora seidauk iha resposta.

ESG Puin Beno, Aldeia Pune, Suku Usi-tasae, Postu Administrativu Oé-silo, RAEOA. Foto/Lazaro Pereira Quefi

“Ami iha ona planu atu submete pedidu bá Edukasaun Rejionál Oé-Cusse atu bele tau matan hodi harii ami nia edifísiu. La’ós, ne’e de’it maibé mós fasilidade seluk hanesan bee-moos ne’ebé laiha inklui biblioteka,” Koordenadór Eskola Paralelu Sekundáriu Jerál Puin Beno, Jacinto Poto Ase Caunan hateten bá Hatutan.com iha nia servisu fatin iha Oé-Cusse, Segunda (28/10/2024).

Eskola ne’e bele jere ka fahe ba rua;  ba EBF Binibu Pune sira tama dadeer no eskola sekundáriu sira hahú iha aula ka aprendizajen iha meiudia too lokraik, maibé la di’ak nafatin tanba realidade eskola uza hamutuk de’it ne’e enfrenta problema oioin.

Mézmu ho limitasaun ne’ebé eskola ho estudante sira enfrenta, maibé Koordenadór Eskola Paralelu Sekundáriu Jerál Puin Beno, Jacinto Poto Ase Caunan, enkoraja nafatin estudante sira badinas aprende no estuda.

Iha fatin hanesan Estudante Eskola Paralelo Sekundáriu Jerál Puin Beno, Julio da Cruz Neno preokupa tebes ho situasaun ne’ebé sira enfrenta iha prosesu aprendizajen, liuliu espasu aula eskola ne’ebé la sufisiente inklui fasilidade aprendizajen ne’ebé kuaze la di’ak.

“Ha’u husu bá Ministériu Edukasaun Rejionál Oé-Cusse atu bele tau netik planu ruma hodi harii ami nia eskola tanba oras ne’e dadaun ami nia aula l’ao ladún seguru tanba ami utiliza hamutuk sala  aula sira ho Eskola Bázika Filial Binibu Pune,” Julio da Cruz Neno preokupa.

Menus Profesór

Eskola Paralelu Sekundáriu Jerál Puin Beno esnfrenta mós problema menus profesór iha área siénsia naturál, disiplina  fízika, biolojia no jeolojia. Ho nune’e, tama ona bá ezame terseiru períodu maibé  laiha profesór mak hanorin matéria sira-ne’e.

Maski matéria balun profesór la iha atu hanorin, maibé estudante sira iha vontade nafatin atu tuir aula tanba ne’e profesór balu taka hodi hanorin disiplina la tuir nia área besik tinan ida ona.

“Ha’u husu ba Ministeriu Edukasaun Rejionál Oé-Cusse atu iha tinan 2025 ne’e bele aloka tan profesór espesífiku sira atu kompleta prosesu aprendizajen ne’e,” Koordenadór Eskola Paralelu Sekundáriu Jerál Puin Beno, Jacinto Poto Ase Caunan tenik.

Jornalista Estajiáriu :  Lazaro Pereira Quefi