Hatutan.com, (28 Outubru 2024), Díli- Asosiasaun Ajénsia Viajen no Operadór Turismu Timor-Leste (AAVOT-TL) husu governu fó prioridade ba ajénsia viajen nasionál hodi kontribui ba kreximentu ekonómiku setór privadu sira nian no hasae taxa ba estadu.

Asosiasaun Ajénsia Viajen no Operadór Turismu Timor-Leste (AAVOT-TL) . Foto/Elio dos Santos da Costa

Portavóss AAVOT-TL, Cristina Exposto ba jornalista sira iha restaurante Aubergine, Metiaut,Ssegunda (28/10/2024) hateten AAVOT-TL hakarak deklara sira-nia indikasaun kona-bá sosa billete aviaun ne’ebé nesesáriu ba viajen serbisu governu nian, uza ajénsia viajen ne’ebé  iha lisensa no autorizasaun hala’o operasaun iha Timor-Leste

AAVOT-TL komprende katak kolabora ho ajénsia viajen lisensiadu ida la’ós de’it garante kumprimentu ho regulamentu legal lokál sira, maibé mós garante jestaun efisiente ba gastu sira ne’ebé asosiadu ho viajen sira hanesan ne’e. Aleinde ne’e, selesaun ba ajénsia lisensiadu ida permite aplikasaun loloos ba retensaun impostu nian, hodi fó benefisiol ba reseita sira Estadu nian no kontribui ba dezenvolvimentu sustentável Timor-Leste nian.

Bainhira governu no entidade sira estadu nia kompra ka sosa billete aviaun husi ajénsia sira online ne’ebé laiha lisensa iha Timor-Leste sei fó implikasaun ba ezisténsia ajénsia viajen iha Timor-Leste ne’ebé legal ka rejistu iha SERVE. Ho nune’e sei fó benefísiu boot liu ba kompañia (AJENSIA) estranjeiru duke ajensia lokal.

“Bainhira Governu sosa billete aviaun iha ajénsia online sei fó vantajen ba kompañia estranjeiru sira, Kompañia estranjeiru laiha lisensa komersial ka autorizasaun atu pratika liuhosi SERVE. La kontribui ba impostu iha Timor-Leste,” Cristina Exposto afirma.

Dezvantajen ba kompañia ka ajénsia lokal maka obrigatóriu hetan lisensa komersial ka autorizasaun atu pratika liu hosi SERVE no Turismu. Obrigatóriu Selu Impostu, Obrigatóriu tuir Tender. Depende ba valór projetu empreza lokál presiza submete garantia bankária 7% to’o 14% depende ba Valór tenderizasaun nian.

AAVOT-TL haree katak Governu fó liu vantajen ba kompañia Eetranjeiru sira no parte Governu la iha interese atu proteje setór privadu lokál, bainhira koʻalia kona-ba impaktu ba setor privadu lokál no traballadór sira.

Governu Timor nia preferénsia atu sosa husi empreza estranjeiru sira bele fó impaktu negativu ba empreza lokál sira, hodi hamosu kompetisaun ne’ebé la hanesan no posivelmente rezulta iha redusaun iha atividade ekonómika lokál. Ida-ne’e bele afeta sustentabilidade no kreximentu negósiu lokál sira.

Impaktu hosi preferénsia governu ida-ne’e ba empreza estranjeiru sira tenke analiza mós iha termu dezenvolvimentu ekonomiku nasaun nian. Ida-ne’e bele afeta balansu komérsiu, kapasidade kreximentu indústria lokál sira no kriasaun empregu iha nivel nasional, politika fiskál sira mós afeta iha tempu naruk ba ita-nia nasaun,

Prezidente AAVOT-TL, Maria Jerónimo hateten kona-ba presu billete aviaun nian kada empreza aplika presu ho modelu rua mak selu imediatu no ida seluk mak kliente kréditu, no bainhira kliente sira ne’ebé sosa ho pagamentu direita uza Cash presu billete oviamente tun la hanesan ho billete ne’ebé deve ka kreditu nian.

Nia afirma ajénsia viajen lokal sira mós bele oferese presu billete ida baratu kuandu kliente sira halo pagamentu direita, hanesan saida mak ajénsia viajen online sira oferese.

Ajénsia viajen lokal sira ne’ebé hamahon an iha AAVOT-TL mak hanesan Rêveuse Travel & Tour Unipessoal Lda, Aby Travel, MEGA Sociedade de Turismo Unipessoal Lda, Hagali Unipessoal Lda, Sesmaro Timor Tour & Travel, S.T.A.T. Robrigado Tours & Travel Unipessoal Lda, Timor Sugar Travel, Eco Discovery Unipessoal Lda, lana Travel, Gosano Tour and Travel Lda, Orange Tour &Travel, Fori Tour & Travel Lda, Bear Travel Agency, DJ Cristovão Tour & Travel, AVAIN Tour & Travel Unipossoa Lda, Orion Tour & Travel, Cof AgenciaTour & Travel, Zelary Tour & Travel, Brangel Travel Unipessoal Lda, Loi Ata Travel, Fatubesi Travel, Sanel Tour & Travel Unipessoal Lda, Allymax Tour & Travel Unipessoal Lda, Venjus Unipessoal Lda, Dimarzorica Unipessoal Lda, Pamelau travel, Dili World Travel, Luvy Travel no LVA TRAVEL AGENCY.

Jornalista: Vito Salvadór