Hatutan.com, (30 Outubru 2024), Díli-Sorumutu Konsellu Ministru ordináriu, Kuarta (30/10/2024), iha Palásiu Governu, aprova  projetu Rezolusaun Governu nian ida hodi kontínua halo suspensaun ka hapara atividade sira prátika grupu arte-marsiál nian bá fulan-neen (6) tán.

Lee Mós:  Governu Kontínua Suspende Atividade GAM-GAR To’o Novembru 2024

Reuniaun Konsellu Ministru. Foto/Dok.Tome da Silva

Rezultadu konsellu ministru nian iha komunikadu imprensa ne’ebé Hatutan.com asesu fó sai katak, Rezolusaun Governu ida ne’e estende, to’o loron 10 fulan-Abríl 2025, suspensaun bá ensinu, aprendizajen no prátika arte-marsiál no enserramentu temporáriu bá fatin no instalasaun hotu-hotu ne’ebé destinadu bá ensinu, aprendizajen no prátika artes marsiais, ne’ebé inisialmente hetan aprovasaun hosi Rezolusaun Governu n. 17/2024, loron 24 fulan-Abríl.

Objetivu hosi Rezolusaun Governu nian ida-ne’e  atu konsolida no reforsa pás sosiál ne’ebé alkansa ona husi kedas fulan-Novembru tinan 2023. Ho abordajen ida ne’ebé konsideradu no kontroladu, hakarak atu iha futuru, permite prátika artes marsiais nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika arte-marsiál no enserramentu temporáriu ba ninia fasilidade sira.

Governu mós felisita populasaun, liu-liu joven sira, bá kolaborasaun ne’ebé sira presta ona hodi kumpre Rezolusaun Governu n. 17/2024, loron 24 fulan-Abríl, ne’ebé kontribui tebes bá manutensaun orden no pás sosiál iha país laran tomak.

Ministru Juventude Desportu Arte no Kultura (MJDAK), Nélio Isaac Sarmento, informa, loos duni katak, enkontru konsellu ministru ne’e, ajenda importante ida maka halo análiza bá Dekretu-Lei Governu anterior kona-bá suspensaun arte-marisiál.

Hafoin rona tiha informasaun no preukupasaun balu kona-bá aktus violentu sira ne’ebé sei akontese, la’os barak hanesan uluk, maibé, oitoan-oitoan sei mosu, ikus mai, konsellu ministru propoin atu sei suspende tán artes marsiais.

Desizaun Governu nian bá suspensaun ida-ne’e, hodi  orienta bá Ministériu Interior, Ministériu Edukasaun, Ministériu Ensinu Superior, Siénsia no Kultura (MESSK), no mós bá MJDAK rasik, atu kontinua servisu liután ho grupu arte-marsiál  sira, hodi haree mós kona-bá sentru juventude sira, no hodi nune’e, hothotu bele intende ona katak, ita prátika artes marsiais ne’e atu bá iha ativiadade desportu, hodi hetan prestasaun.

“Ha’u hanoin katak, suspenasaun ne’e sei bá fulan-neen (6) tán. Purtantu, fulan Novembru ne’e to’o fali tán iha parese fulan marsu ka maiu 2025. Entaun, iha ne’ebá, ita sente katak, sé atividade artes marsiais sei hanesan ne’e, ne’e oportunidades di’ak, tanba tinan oin, ita orienta ona atividades desportivas,” Ministru Nélio Isaac Sarmento, informa bá jornalista sira.

Governante ne’e dehan, MJDAK liuhosi Komisaun Reguladóra bá Arte-Marsiál (KRAM) sei toma nafatin nota bá instrusaun ne’ebé mai hosi rezolusaun foun ne’e, hodi nune’e, KRAM sei nafatin halo nia servisu hamutuk ho sentru treinamentu sira artes marsiais sira nian, inklui organizasoens artes marsiais nian.

Jornalista: Rogério Pereira Cárceres