Hatutan.com, (14 Novembru 2024), Díli- Orsamentu Jerál Estadu (OJE) 2025 ne’ebé aloka bá Ministériu Finansa ho montante $18,889,241  pasa iha diskusaun espesialidade iha Parlamentu Nasionál.

Lee Mós: KHUNTO Fó Hanoin Gasta Osan ho Kuidadu, OJE 2025 $15,867,337 bá Vise-PM Asuntu Ekonómiku Pasa

Ministra Finansas (MF), Santina Viegas Cardoso. Foto/Dok

Liuhosi votasaun, Kinta (14/11/2024), membru Parlamentu Nasionál sira ne’ebé prezente fó sira-nia votu a-favór 43, kontra 18  no abstensaun tolu (3) bá orsamentu Ministériu Finansa $18,889,241  hodi utiliza ba servisu no nesesidade tinan tomak 2025 nian.

Orsamentu bá Ministériu Finansa  ho totál $18,889,241  ne’e fahe bá kategoria lima mak hanesan Saláriu Vensimentu $9,659,322, Bens Servisu $8,347,225, Transferénsia Públika laiha (0), Kapitál Menor $45,000 no Kapitál Dezenvolvimentu $837,694.

Iha  diskusaun bá proposta orsamentu  bá Ministériu Finansa laiha proposta husi membru PN sira  nune’e rezultadu votasaun bá  Ministériu Finansa pasa. Maske nune’e,  membru PN hosi Bankada KHUNTO, Luis Roberto husu esklaresimentu bá iha Ministra Finansa sobre kapitál menor ho $45,000 depois kapitál dezenvolvimentu $837,694 atu halo ba saida.

Hatán bá preokupasaun ne’e Ministra Finansa Santina Viegas Cardoso hateten kapitál menor ho $45,000 halo saida de’it bele ita bá haree iha livru asaun anuál Ministériu Finansa nian iha ne’ebá iha diskrisaun projetu sira ne’ebé mak Ministériu Finansa iha.

“Maiória projetu sira ne’e retensaun ne’ebé projetu sira ne’e implementa iha tinan ida -ne’e no mós iha retensaun ita lori bá 2025 projetu foun bá MF nian bá 2025 mak konstrusaun dormitóriu foun bá Autoridade Aduaneira iha fronteira Salele ho kustu $400,000. Restante husi ne’ebá hanesan halo reabilitasaun bá security coustem estatístika   iha Fronteira Batugede, iha mós Munisípiu Aileu no mós Ainaro,” Ministra Finasa esklarese.

 Iha parte seluk Prezidente Komisaun C, Cedelizia Faria dos Santos fó pontu balu ne’ebé mak hakarak fó hanoin bá Ministériu Finansa primeiru mak kona-bá taxa sira ne’ebé mak aprová ona iha lei liuliu agua minerais sira ne’e favór ida implementa tuir lei.

Segundu, mak kona-bá based coud ne’ebé bainhira i aprová ona iha lei sé bele iha portal transferénsia halo numerasaun bá based coud sira ne’e tuir lei ne’ebé mak aprová nune’e bainhira  haree iha lei no portal transferénsia buat rua ne’e halai hanesan.

Jornalista Estajiária : Zita Menezes