Hatutan.com, (22 Novembru 2024), Díli—Ministériu Edukasaun (ME) halo ona pagamentu kona-bá subsídiu kolokasaun insiál no subsídiu transporte bá profesór Bolsa Kandidatu faze da-huluk no da-ruak ho montante $1, 063, 377 bá Professores na’in 1.108  iha fulan Novembru 2024.

Ministériu Edukasaun (ME) liu-hosi Diresaun Nasionál Rekursu Umanu (DNRH) halo Konferénsia Imprensa iha salaun enkontru VIP ME Vila Verde, sesta 22 Novembru 2024, hodi relata kona-bá pagamentu saláriu, subsídiu transporte, no mós subsídiu kolokasaun inisiál bá professór bolas kandidatu. Foto: Lázaro Pereira Quefi.

Profesór hirak ne’e kolokadu bá eskola sira iha territóriu Timor-Leste tomak, no pagamentu faze da-toluk sei iha hela prosesu insersaun dokumentu iha SIGAP Komisaun Funsaun Publiku (KFP) no sei integra iha fulan dezembru 2024.

Lee Mós: Polísia Detein Eis-Profesór Kontratadu Na’in-25, FRETILIN ho PLP Fó Solidariedade

Iha Sesta 22 Novembru 2024, Ministériu Edukasaun liu-hosi Diresaun Nasionál Rekursu Umanu halo Konferénsia Imprensa iha salaun enkontru VIP ME Vila Verde, hodi relata kona-bá pagamentu saláriu, subsídiu transporte, no mós subsídiu kolokasaun inisiál bá professor hirak ne’e.

Diretora Nasionál Rekursu Umanu ME, Anita Tavares Ribeiro de Jesus hateten, andamentu prosesu pagamentu saláriu, subsídiu kolokasaun no subsidiu transporte bá profesór foun bolsa kandiadatu nian ne’ebé koloka iha etapa primeiru, segundu no terseiru iha tinan 2024.

“Iha kolokasaun faze da-huluk no da-ruak nian hosi proseu bolsa kandidatu konsege halo pagamentu hotu inklui saláriu kada fulan hosi loron 14 fulan maiu. Subsídiu kolokasaun inisiál no subsídiu transporte prosesa ona no halo ona pagamentu iha fulan Novembru, osan tama ona iha ida-idak nia konta bankária,” Anita Tavares Ribeiro de Jesus hateten.

Parte Diresaun Nasional Rekursu Umanu informa bá profesor sira hosi prosesu kolokasaun da-huluk no da-ruak karik salariu no subsidiu sira seidauk tama iha konta bankária, husu atu informa lalais mai ME-DNRH hodi haree tuir fali prosesu ne’e.

“Saláriu baze prosesu normal bá bacharelato $278 no Lisensiatura $288,” Anita Tavares Ribeiro de Jesus sita.

Husu mós bá Professór sira kolokadu iha etapa atu aselera prosesu submisaun lista prezensa kada fulan mai ME-DNRH, ne’ebé asinadu hosi Diretór Eskola ida-idak tantu eskola privada, eskolas publika no escolas Cafe.

Ba profesores kolokadu iha etapa da-toluk tenke aselera mós ho lista prezensa kada fulan labele liu iha loron 15 Dezembru 2024 no pagamentu sei iha prosesu, nune’e sei tama iha fulan dezembru.

Profesores bolsa kandidatu faze da-huluk 443, da-ruak 665 no da-toluk 476 ho total 1.584.

Jornalista Estajiáriu: Lázaro Pereira Quefi