Hatutan.com, (03 Dezembru 2024), Díli-Polisia Nasionál Timor-Leste (PNTL) Munisípiu Díli, Sábadu (30/11/2024), kaptura sidadaun mane na’in-neen (6) tanba deskonfia hanesan autór bá kazu konfrontu tuda-malu iha área Hudi-laran, Aldeia Rai-Na’in, Suku Bairru Pité, Postu Administrativu Dom Aleixo, Munisípiu Díli.

Tribunál Distritál Díli. Foto/Dok. Hatutan.com

Insidente ne’e akontese iha tuku 03:00 madrugada, bainhira joven sira hosi Aldeia Rai-Na’in bá partisipa serimónia festa kazamentu ida iha Aldeia Teki-Teki. Joven sira hosi aldeia rua baku malu uluk, ikus mai halo sira asaltu malu liuhosi tuku no tuda-malu.

Kazu ne’e rasik, rezulta komunidade balu nia sasán hetan estragu no vidru iha edifísiu Jornál INDEPENDENTE ema tuda rahun.

Iha Sábadu dadeer liubá, Polísia konsege foti sidadaun na’in-neen (6) ho identidade inisiál JdC, JM, RALS, DdC, CdC no SPS, lori bá halo identifikasaun iha Departamentu Investigasaun Kriminál Nasionál iha Kuartél Jenerál PNTL Caicoli, no halo kedas detensaun durante oras 72 iha sela Polísia.

Iha Tersa, 03 fulan-Dezembru 2024, hale’u tuku 08:30, Otl, Tribunál Judisiál Primeira Instánsia Díli (TJPID) realiza  primeiru interrogatóriu judisiál bá Arguido sira no iha audiénsia ne’e, Ministériu Públiku (MP) liuhosi Prokuradór Osório de Deus, promove arguido sira ho Kríme Dano Agravado, tuir Artigu 260, Lei Kódigu Penál Timor-Leste, tanba sira-nia hahalok, harahun no estraga komunidade sira ninia uma. Maibé, Defensór Marçal Mascarenhas, defende nia kliente sira, no husu Tribunál atu aplika de’it Termu Identidade Rezidénsia (TIR) bá arguido sira.

Rona tiha desizaun hotu, Tribunál liuhosi Juiza Prosesu Zulmira Auxiliadóra, hasai despaxu ikus hodi liberta totál tiha arguido sira ne’e.

Defesór Marçal Mascarenhas, ne’ebé fó asisténsia legál bá  nian kliente sira na’in-neen (6) hanesan arguido ne’e, informa katak, despaxu ikus hosi Tribunál ne’e, fó libertasaun totál bá arguido sira, tanba Polísia sala iha detensaun no loloos, tuir lei  iha detensaun rua detensaun fragante delito no detensaun fora fragante delito.

“Polísia lori ba Tribunál dehan katak fragante delito, afinál detensaun sira ne’e la’ós fragante delito,  tanba depois akontese madrugada, aban tuku 10:00 tiha mak polisia foin foti sira iha uma. Bá foti sira iha uma, loloos tuir lei tenke uza mandadu tribunál nian, tanba laiha mandadu detensaun, entaun arguido sira tenke hetan liberdade hotu,” Defensór Marçal Mascarenhas, informa bá Jornalista sira.

Maske nune’e, investigasaun hosi ministériu públiku, sei la’o nafatin, mais, ida kona-bá kazu krime, maibé ligasaun ba detensaun sira ne’ebé mak lori to’o Tribunál ne’e mak ilegál tanba la tuir lei.

Prosesu primeiru interrogatóriu ne’e prezide husi  Juiza singular Zulmira Auxiliadora, Ministériu Públiku reprezenta hosi prokuradór Ozóriu de Deus no arguido sira hetan asisténsia legál husi defensór públiku Marçal Mascarenhas.

 Jornalista: Rogério Pereira Cárceres