Hatutan.com, (05 Dezembru 2024), Díli- Primeiru-Ministru (PM), Kay Rala Xanana Gusmão liu husi enkontru semanál ho Prezidente Repúblika José Ramos-Horta, Kinta (05/12/2024),  promete katak Orsamentu Jerál Estadu (OJE) 2025 ho montante billaun $ 2,6 ne’ebé promulga ona sei fó benefísiu direita ba povu liu husi progresu servisu Governu nian ne’ebé sei halo bazeia ba planu ne’ebé iha.

Lee Mós: Ramos-Horta Promulga Ona OJE 2025 Billaun $2,6

PR Ramos-Horta tula PM Xanana la’o haleiu Palásiu Prezidensiál, Kinta (05/12/2024). Foto/Elio dos Santos da Costa

Primeiru-Ministru, Kay Raya Xanana Gusmão hateten OJE 2025 ne’e nia benefísiu ba povu ne’e la’ós fó osan ka fahe osan ba povu, maibé benefísiu ba povu sei halo eskola ida iha área rurál povu hetan benefísiu tanba nia-oan sira ba eskola iha ne’ebá, halo mos rezidénsia ba manorin na’in sira no halo mos klínika ne’e benefísiu indiretu ba povu.

“Ha’u mós dehan ona ba Prezidente Repúblika, no ha’u dehan tiha ona iha Parlamentu Nasionál, kada trimestre ha’u sei  la’o hale’u munisípiu tanba ha’u hatene Governu nia programa, ba iha fatin ida-ida, ministériu ida ne’ebé nian haree halo ona ka  lae, no halo nusa, se halo ona mais tenke halo ho kualidade, atu nune’e 2026 prova katak saida maka imi hotu rona ona iha Parlamentu Nasionál ne’ebá,” Xanana Gusmão hateten.

Xefe Governu subliña mós katak tinan 2024 ne’e nu’udár tinan atu haree irregularidade barak ne’ebé iha atu bele korrije, liu-liu iha sistema finanseiru no tinan 2025 sei sai tinan implementasaun, katak implementa saida mak Governu tau iha OJE 2025.

La Garante Ezekusaun OJE 2024 To’o 90%

Primeiru-Ministru Kay Rala Xanana Gusmão argumenta ezekusaun OJE 2024 ne’ebé foin atinje 75% to’o tinan ne’e remata sei labele too 90% tamba governu sei hadia irregularidade sira ne’ebé iha.

“Ita la bele garante hanesan ne’e, foin daudauk, ha’u ko’alia daudaun ne’e, iha Parlamentu Nasionál ha’u dehan beibeik, no dehan kedas uluk,  mais ha’u repete 2024 ami sei la ezekuta barak liu, tanba presta atensaun barak liu ba iha irregularidade,” Xanana informa.

Nia subliña mós katak foin lalais hetan tan iha Munisípiu Dili de’it, merenda eskolár la uza, Tinan sira kotuk, osan iha ne’ebé, osan iha hela banku, tenke fó fila hotu ba kofre estadu, ne’e maka 2024  gasta tempu barak atu haree buat sira nune’e hotu, ida ne’e maka importante.

Jornalista: Vito Salvadór