Hatutan.com (27 Dezembru 2024), Díli—Estudante Universidade da Paz (UNPAZ), hanesan mós joven ida ho naran Venincia dos Santos Maia husu bá estudante no joven sira atu lebele moe buka osan hodi sustena moris inklui nesesidade bá estudu.

Estudante Universidade da Paz (UNPAZ), Venincia dos Santos Maia. Foto: Zita Menezes

Joven ida ne’e ho nia korajen nunka no nunka rende atu hala’o buat rua dala ida mak hanesan estudu no buka osan rasik liu hosi fa’an roupa.

Lee Mós: Ramos-Horta Admite Labarik sira Halo Negósiu, Importante Badinas ba Eskola

Aproveita tempu oportunu, liu-liu selebrasaun festa Natal nian, Venincia dos Santos Maia fa’an roupa iha fatin públiku sira tanba iha momentu ida-ne’e ema barak mak hola.

Objetivu hosi buka osan ne’e hodi bele hakman inan-aman no sustena an rasik liu-liu ninia nesesidade lorloron no mós selu rasik eskola.

Oras ne’e daudaun Venincia dos Santos Maia frekuenta ona estudu iha UNPAZ semester V (lima) iha Fakuldade Akonomia, Departamentu Bankária.

Nia mai hosi munisípiu Bobonaro hala’o estudu iha Díli, lakohi atu husik tempu leet hodi halimar tanba ninia moris fatin mós dook hosi sidade, nune’e aproveita loron Natal no tinan foun fa’an roupa iha fatin negósiu Golgota.

Bainhira Jornalista Hatutan.com hakbesik ba nia hodi dada-lia, feto ran ne’e la sente moe atu konta esperiensia moruk ne’e bá média, maibé nia kontente liu-tán tanba hakarak atu motiva joven sira no mós estudante sira atu labele moe buka osan.

Menina fuuk-been, metan morena ne’e konta tuir katak, ninia inan aman mós ema ne’ebé halo nanis negósiu tama sai merkadu fa’an sasan hodi buka osan.

Tanba ne’e nia mós hakarak atu hakat tuir inan aman nia ain fatin hanesan halo negósiu hodi buka osan rasik.

“Lalika moe atu buka osan. Bainhira ita moe ita osan laiha. Ita eskola ne’e aprende buat barak. Tanba ne’e bainhira ita aprende tenke aplika mós iha moris. Ha’u sai eskola buka osan liu hosi fa’an roupa tanba ha‘u aprende mós teoria iha eskola,” nia haktuir bá Hatutan.com iha Golgota, (27/12/2024).

Antes ne’e Venincia fa‘an iha área Ai-tarak laran, fa’an mós iha Merkadu Lama, iha Taibesi no iha loron boot ne’e nia mai aluga fatin iha Golgota tanba haree katak, movimentu barak liu.

Hatutan.com husu kona-bá loron ida hetan hira, nia dehan de’it katak iha loron boot ne’e kada loron konsege hetan to’o $200.

“Ha’u sustenta an liu-liu selu eskola ho fa’an roupa de’it. Tanba ne’e maski eskola maibé sempre fahe tempu atu fa‘an roupa,”  nia hateten ho kontente.

Ikus liu nia hameno hela ba joven sira liu-liu estudante sira atu moris ho prinsípiu, labele dependente liu ba inan-aman, maibé koko atu hamosu kreatividade oioin, hanoin inovativu, tanba iha oportunidade barak no buat barak ne’ebé bele halo nakfilak ba osan no bele lori ema bá susesu.

Nia sita katak, susesu ne’e la mai hosi bandeza laran, maibé maihosi kompaixaun, sakrifísiu no hanoin inovativu, tanba ne‘e labele hanoin katak bainhira fa’an roupa iha merkadu ne’e halakon tiha diginidade nu’udár ema, maibé hetok ida-ne’e valoriza liu tán ita nu’udár ema.

Realidade hatudu katak, saida mak Venincia halo, lori nia tama ona semester V no selu rasik eskola no lakleur tán bele hetan ona grau akadémiku lisensiatura.

Jornalista Estájiaria: Zita Menezes