Hatutan.com, (16 Janeiru 2025), Díli- Ministru Justisa (MJ), Sergio de Jesus Fernandes da Costa Hornai, la tolera broker sira fasilita trata dokumentu iha Diresaun-Jerál Servisu no Rejistu Notariadu tamba ne’e ilísitu no sei prejudika transparente no kontabilidade estadu.

Lee Mós: Presiza Investiga Hodi Denunsia Broker iha Diresaun Jerál Servisu Rejistu Notariadu

Timoroan sira tuur hein iha edifisiu Diresaun-Jerál Servisu Rejistu no Notariadu, hodi trata sira-nia pasaporte. Foto/Dok.Leopoldina de Carvalho

Ministru Justisa hato’o deklarasaun ne’e ba jornalista sira iha edifísiu Ministériu Justisa, Colmera, Kinta (16/01/2025) hodi hatán kona-bá preokupasaun ne’ebé públiku levanta  relasiona ho broker sira ne’ebé sempre halo atividade hodi hetan porsentu hosi fasilita trata dokumentu iha Diresaun-Jerál Servisu no Rejistu Notariadu.

“Ita laiha toleránsia ba ida ne’ebá, eziste de’it iha ne’ebá aparellu estadu nian, karik iha ajénsia sira ne’ebé apropriadu tanba hetan lejitimidade ne’ebé husi sidadaun sira ka grupu sira emprezariál organizasaun ruma fó prokurasaun ba sira tanba sira ajénsia entaun ida-ne’e iha rasik ninian mekanizmu. Laiha fatin ba broker sira ne’ebé nafatin hala’o atividade ilísitu iha instituisaun estadu sira hodi kauza ba transparénsia no kontabilidade boa Governasaun,” Ministru Justisa Sérgio de Jesus Fernandes da Costa Hornai.

Nia subliña laiha fatin ba broker, ba iha hahalok sira ne’ebé atu hamosu ilísitu  ba irregularidade sira lori no kauza ba transparénsia no kontabilidade ba iha boa Governasaun. Hahalok ezisténsia broker iha Notariadu sira, Ministériu Justisa la permite no husu atu hapara.

Sergio Hornai mós husu ba sidadaun hotu atu labele kompromete aan ba aktu sira ne’e, no situasaun sira ne’e mak sei hamosu irregularidade no ilísitu.

Governante ne’e mós husu atu bainhira sidadaun sira iha keixa ruma bele hato’o ba Ministériu nune’e bele halo denúnsia ba ajente ka funsionáriu sira ne’ebé sai broker iha servisu notariadu liuliu tratamentu ba Billete Identidade (BI), Pasaporte no seluk tan.

“Karik iha denúnsia se ita rona karik mós hatene halo keixa ka iha flagrante delitu nia tenke hola medida sira tanba ita-nia lei, tantu iha prosedimentu administrativu mós iha, lei kriminál mós adminite bainhira iha ajente ba sidadaun ruma kompromete sira-nia aan ba aktus ilísitu sira ne’e.” Nia Subliña.

Ministru Justisa  mós fó ona instrusaun ba servisu notariadu atu halo emisaun, dokumentu hotu-hotu tenke ofisiál hodi atribui ba sidadaun sira.

Jornalista: Vito Salvadór