Hatutan.com, (16 Janeiru 2025), Díli– Tribunal Judisiál Primeira Instánsia Suai liuhusi Juiza Patricia de Araujo Xavier, hatún despaixu hodi aplika Termu Identidade Rezidénsia (TIR) ba arguido GdSM ne’ebé  lori kilat-musan tama mai área Timor-Leste liu husi postu fronteira Batugade, Munisípiu Bobonaro.

Lee Mós: Joven Na’in-rua Lori Bala-Musan Ualu husi Arma PNTL Tama-Sai Indonézia Liu husi Fronteira Batugadé

Evidensia sira ne’ebé autoridade sra asegura hosi suspeitu na’in-rua. Foto/supply

Razaun Tribunal aplika TIR ba iha arguido tanba hafoin Tribunál rona tiha depoimentu husi arguido durante iha prosesu interrogatóriu dahuluk ne’ebé hala’o iha Tribunal Judisiál Primeira Instánsia Suai, kuarta (15/01/2025), nune’e Tribunal haree katak  laiha indísiu ruma ba krime, tanba ne’e Tribunál hatún despaxu hodi aplika Termu Identidade Rezidénsia ba arguido GdSM.

¨Hau sertifika katak iha loron 15/1/2025  tuku  14:20  fó liberdade ba arguidu  naran GdSM, hela fatin aldeia Pissu Kraik, Suku Lauhata Postu-Administrativu Bazartete, Munisipiu Likiquiça,¨sita husi despaxu Tribunal nian ba arguido ne’ebé Hatutan.com asesu, Kinta (16/01/2025).

Juiza Patricia  mós deside hodi devolve fila fali kilat-musan ne’ebé arguido GdSM hatama husi fronteira Batugade ba autoridade sira tamba konsidera ida ne’e nu’udár objetu krime ne’ebé autoridade seguransa prende husi arguido GdSM.   

Iha  Domingu (12/01/2025), hale’u tuku 11:15  dadeer,  Servisu Nasionál Intelijénsia (SNI) no Alfándega  asegura suspeitu na’in-rua ho inisial  GdSM no OLSG  tanba lori kilat-musan ualu  (8) tama mai  Fronteira  Batugade hafoin  fila husi Timor Osidentál-Indonézia.

Suspeitu na’in-rua ne’e Alfándega no SNI asegura hafoin mákina  X-Ray deteta katak sidadaun na’in-rua  ne’e lori bala musan ualu, no hafoin asegura tiha suspeitu na’in-rua ne’e, autoridade sira asegura mós telefone ida. Kazu ne’e Ministériu Públiku rejista ho númeru NUC0020/25.PNSIC.

Jornalista: Vito Salvadór