Hatutan.com, (22 Janeiru 2024), Díli– IX Governu Konstitusionál iha reuniaun Konsellu Ministru, kuarta (22/01/2025), liu husi Ministru Prezidénsia Konsellu Ministrus, Agio Pereira, no Koordenadór hosi Gabinete Dezenvolvimentu Polítikas Públikas Estratéjikas, André Monteiro, halo aprezentasaun ida kona-ba Saúde Dijitál ka e-saúde.

Lee Mós: Governu Nafatin Fó Prioridade Solusiona Problema Kaderneta Pasaporte no Blanku BI

Reuniaun Konsellu Ministru iha Palásiu Governu, Kuarta (22/01/2025). Foto/Gov.tl

Komunikadu ba imprensa  ne’ebé Hatutan.com asesu husi portal ofisial timor-leste. gov.tl  informa Saúde Dijitál, ka e-saúde, mak aplikasaun teknolojia informasaun no komunikasaun nian iha área saúde. Organizasaun Mundiál Saúde (OMS) define Saúde Dijitál hanesan téknika, prátika no atitude lubun ida ne’ebé kontribui ba efisiénsia sistema saúde nian.

Introdusaun ba sistema saúde dijitál iha Timor-Leste bele lori vantajen signifikativu oioin, inklui transformasaun ba prosesu manuál sira ne’ebé lori tempu naruk sai solusaun dijitál ne’ebé intelijente. Sistema ida-ne’e permite implementasaun rejistu klíniku eletróniku sentralizadu, hodi garante asesu no sinkronizasaun dadus iha tempu reál, promove efisiénsia, modernizasaun no hadi’a kualidade servisu saúde ne’ebé fornese ba populasaun.

Iha reuniaun Konsellu Ministru ne’e mos Ministru Prezidénsia Konsellu Ministrus Agio Pereira halo mós aprezentasaun ida kona-ba Rejimentu Konsellu Ministrus, ho objetivu atu hadi’a funsionamentu reuniaun Konsellu Ministrus no aperfeisoa prosedimentu lejizlativu Governu Konstitusionál da-9 nian.

KM Estende Mandatu Prezidente Konsellu Diretivu Imprensa Nasionál Timor-Leste, I.P.

Konsellu Ministru aprova projetu Rezolusaun Governu, ne’ebé aprezenta husi Ministru Prezidénsia Konsellu Ministrus, Agio Pereira, ne’ebé renova mandatu Jaime Fernando dos Mártires Carvalho Correia nian, nu’udar Prezidente Konsellu Diretivu Imprensa Nasionál Timor-Leste, I.P. nian.

“Desizaun ne’e bazeia ba kapasidade téknika, esperiénsia no kompeténsia komprovada ne’ebé hatudu ona iha jestaun entidade ida-ne’e nian, hodi rekoñese katak kontinuidade iha dezempeñu funsaun sira sei garante izensaun, imparsialidade no idoneidade sira ne’ebé presiza. Mandatu foun ne’e sei dura tinan haat.” Haktuir iha komunikadu.

Ikusliu, Konsellu Ministrus fó toleránsia pontu iha loron 29 fulan-janeiru Tinan 2025 ba okaziaun Tinan Foun Xina nian.

Jornalista: Vito Salvadór