Hatutan.com, (31 Janeiru 2025), Díli -Ró Berlin Nakroma, Kinta dadeer foin lalais ne’e,  hetan asidente iha Ponte-Kais Tanjung Perak, Surabaya-Indonézia, tanba laloran boot.

Ministru Transporte no Komunikasaun (MTK), Miguel Marques Gonçalves Manetelu. Foto/Tome da Silva

Ró Nakroma ne’ebé fulan rua liubá halo manutensaun iha Indonézia hetan asidente tanba laloran tasi boot hodi halo ró ne’e kose ró boot seluk ne’ebé atraka hela iha Ponte-Kais  Tanjung Perak nian.

Iha insidente ne’e, parte Dewa Ruci Agung, empreza ne’ebé halo manuteunsa ba Ró Berlin Nakroma mak responsabiliza.

Ministru Transporte no Komunikasaun (MTK), Miguel Marques Gonçalves Manetelu, ne’ebé Sesta (31/01/2025), halo vizita urjente ba edifísiu APORTIL, klarifika katak  iha informasaun katak iha duni asidente maibé Prezidente APORTIL, José de Oliveira Leong, hateten katak iha duni asidente la’ós soke.

APORTIL rasik sei halibur hela informasaun hodi hato’o ba Ministériu Transporte no Komunikasaun,  maibé informasaun seidauk to’o públiku hateten uluk tiha ona relasiona ho ida ne’e.

MTK  husu atu oinsá bele aselera  kontaktu ba Surabaya hodi husu tuir informasaun kona-bá kondisaun asidente ne’e akontese oinsá. Se lae, públiku bele kestiona nafatin dehan Ministru Miguel Manetelu hatene hela mais taka informasaun.

Iha fatin hanesan Prezidente Administrasaun dos Portos de Timor Leste, Institutu Públiku  (APORTIL, I.P), José Oliveira Leong klarifika katak Ró Berlin Nakroma iha asidente duni iha Surabaya la’ós ró soke tanba laloran boot mak lori to’o kose ró boot ida para iha ne’ebá.

“Ami iha dadus kompletu iha ne’e atu hateten ba públiku katak la iha tan adisionál ona ba akontesimentu ne’e tanba ami iha ona akordu ho Kompañia Dewa Ruci Agung katak ró para iha rai maran mak akontese buat ruma nia mak responsabiliza no para iha tasi Surabaya nian mak akontese buat ruma mós kompañia mak responsabiliza ne’ebe APORTIL se la hasai tan sentavu ida ba problema ida ne’e,” José Oliveira Leong  klarifika.

José Oliveira Leong hatutan informasaun sira klaru ho dokumentu mós kompletu hotu ona ne’ebe akordu saida halo ona ho kompañia Dewa Ruci Agung no APORTIL la hasai sentavu ida ba asidente ne’e.

Jornalista Estajiária : Lazaro Pereira Quefi