Hatutan.com, (04 Fevereiru 2025), Díli-Empreza aviasaun  Aero Díli ho Citilink, Tersa (04/02/2025), hala’o enkontru koordenasaun ho Autoridade Aviasaun Sivíl Timor-Leste (AACTL, portugés) hodi halo diskusaun kona-bá folin billete aviaun ne’ebé sai preokupasaun públiku durante ne’e.

Lee Mós: Prezidente Repúblika Husu Governu Tane Aero Dili no La Nesesita Atu AirAsia Semo Denpasar-Dili

CEO Empreza Aero Dili, Lourenço de Oliveira. Foto/Elio dos Santos da Costa

Na’in ka CEO  empreza Aero Díli, Lourenço de Oliveira hateten sira-nia prezendsa hanesna emprezáriu timoroan  iha AACTL atu koordena ho AACTL kona-bá preokupasaun sira folin billete aviaun nian no buat hotu los ona no AACTL mak sei hato’o ba Ministru Transporte no Telekomunikasaun, Miguel Marques Gonçalves  Manetelu hodi hatán ba preokupasaun ne’ebé públiku no membru Parlamentu Nasionál balu levanta iha plenaria Parlamentu Nasionál, foin lalais ne’e.

“Husi parte AACTL bolu ami mai atu responde preokupasaun sira ne’ebé mak deputadu sira levanta iha Parlamentu Nasional no buat hotu ami fó hatene ona ba sira no sei hato’o ba Ministru relevante kona-áa presu billete aviaun ba oin ne’e oinsá, parte AACTL mak sei divulga ba públiku,” Lourenço de Oliveira informa.

Hatutan.com tenta kedas atu halo konfirmasaun ho Prezidente AACTL hodi hatene kona-ba rezultadu enkontru entre empreza Aero Díli no Citilink ho parte AACTL, maibé tékniku sira informa de’it katak depois mak sira sei bolu média hotu atu halo divulgasaun informasaun dala ida de’it ba públiku.

Jornalista: Vito Salvadór