Hatutan.com, (13 Fevereiru 2025), Díli- Primeiru-Ministru Kay Rala Xanana Gusmão deklara  tempu ona Atoni-oan (refere ba Oe-Cusse oan sira) lidera Rejiaun Administrativa Espesiál Oe-Cusse-Ambeno no Zona Espesiál de Ekonómiku Sosiál de Merkadu (RAEOA-ZEESM).

Lee Mós: Governu Ezonera Elvira Manat husi Kargu Sekretária Rejionál Finansas RAEOA

PM Xanana Gusmão enkontru ho PR José Ramos-Horta iha Palásiu Prezidensiál, Kinta (13/02/2025). Foto/Elio dos Santos da Costa

Primeiru-Ministru Kay Rala Xanana Gusmão hato’o deklarasaun ne’e ba jornalista sira iha Palásiu Prezidensiál,  Kinta (13/02/2025) hafoin hasoru malu ho Prezidente Repúblika José Ramos-Horta hodi informa kona-ba inisiativa atu vizita Oé-Cusse iha semana oin.

“Ha’u mós dehan ona ba Prezidente Repúblika katak Segunda-feira, semana mai ne’e ha’u iha Oe-Cusse, atu rezolve problema ordenasaun planeamentu,” Primeiru-Ministru Kay Rala Xanana Gusmão hateten.

Xefe Governu hatutan tanba RAEOA-ZEESM kria tiha liu ona tinan 10 haree mak Pante Makasar ne’ebé foin daudauk kria mós nonu governu haree ba problema boot tebe-tebes iha rai boot ne’ebé ladún tau atensaun.

Xanana afirma liután katak semana mai ne’e nia sei iha Oé-Cusse loron lubuk ida iha ne’ebá hodi diskute ho Atoni-oan sira, diskute ho Prezidente Autoridade no responsavel dezenvolvimentu.

“ ZEESM loos ne’e dehan, agora se governu lokál ne’e ita temi tenke rai nia oan mak kaer, ha’u husi Manatuto ha’u labele ba kaer fali governu lokál iha Aileu ka Suai labele. Ne’ebé ZEESM ne’e ita lori ema sira ba nune’e prepara Atoni sira nune’e sira mak atu kaer ne’ebé ne’e hotu mak informa ba ita boot sira,” Xanana Gusmão haktuir.

Jornalista: Vito Salvadór