Hatutan.com, (24 Fevereiru 2025), Díli—Membru Parlamentu Nasionál (PN) husi Bankada CNRT,  Firmino Taecki, informa  prezensa Primeiru-Ministru (PM), Xanana Gusmão iha Rejiaun Administrativu Espesiál Oé-Cusse (RAEOA) hodi liu ba to’o iha Naktuka, hodi fó hanoin ba populasaun sira iha Naktuka atu tuur hakmatek no labele monu ba provokasaun ka propaganda sira ne’ebé lansa husi forsa Indonézia nian iha área refere.

Lee Mós: TNI Tama To’o Naktuka ho Rajaun Buka Drone

PM Xanana diálogu ho komunidade sira kona-bá kestaun Naktuka, 18 Fevereiru 2025. Foto/Média GPM

Iha  Tersa, 18 fulan-Fevereiru  2025, Primeiru-Ministru, Kay Rala Xanana Gusmão vizita ba Naktuka hodi halo dialogu ho komunidade Naktuka.

Xanana ba Naktuka tanba rona informasaun katak Tentara Nasionál Indonézia (TNI)  ameasa populasaun iha Naktuka, ho nune’e, PM Xanana enkoraja komunidade sira atu hakmatak no mantein pás hodi labele monu ba provoka no infiltrasaun TNI sira nian.

“Ha’u mós akompaña iha ne’ebá, ne’ebé TNI sira mai iha rai Naktuka ameasa ita-nia ema sira maibé ami konsege bá to’o iha ne’ebá, populasaun sira  hato’o  Primeiru-Ministru no Primeiru-Ministru  orienta bá sira hakmatek tuur nonook no lalika bá provoka bá malu,” Deputadu Firminu Taecki haktuir iha plenaria PN, Segunda (24/02/2025).

PM Kay Rala Xanana Gusmão mós adianta informasaun bá populsaun sira katák rai Naktuka sei iha problema (disputa) hela, seidauk iha desizaun final no tempu badak PM Xanana sei ko’alia ho Prezidente Repúblika Indonézia Prabowo Subianto atu bele rezolve rai Naktuka.

Molok ne’e, iha Segunda, 17 fulan-Fevereiru 2025, PM Xanana, hasoru-malu ho Komandante Resor Militár (Danrem) 161 Wira Sakti Kupang, Brigadeiru Jenerál (Brigjen) TNI, João Xavier Barreto Nunes iha Postu Integradu Fronteira Indonézia nian iha Motain, ko’alia liu oinsá promove dame entre povu rai rua iha área fronteira terrestre.

Hosi sorin seluk, membru PN husi Bankada FRETILIN, Lidia Norberta hato’o preokupasaun relasiona ho area Naktuka nian.

Bankada FRETILIN fó hanoin katák iha tinan 2024 populasaun husi área Naktuka Citrana hato’o protestu no la satisfás bá servisu Gabinete Fronteira Terrestre nian ne’ebé tau fali estaka iha natar populasaun nian hodi fahe tiha baliza entre Citrana no Oepoli.

Iha Sesta, 21 Fevereiru 2025 haree iha meiu komunikasaun sosiál haree katák populasaun husi Oepoli tama mai área Naktuka nian hodi mai ko’alia ho populasaun iha Naktuka katák, iha loron 24 fulan-Fevereiru 2025 sira sei mai hodi hahú ona servisu iha natar no tau ona baliza natar iha ne’ebá.

Membru komisaun B PN ne’ebé trata asuntu Negósiu Estranjeiru Defeza no Seguransa ne’e hateten populasaun Oepoli halo protesta hafoin liu tiha loron rua, Primeiru-Ministru Kay Rala Xanana Gusmão  hasoru populasaun iha Naktuka iha loron 18 Fevereiru 2025.

“Haree bá situasaun ida-ne’e nu’udár reprezentante povu ami husu atu Governu tenke kumpre devér Estadu nian hodi defende soberania ita nian rai doben no povu doben Timor-Leste,” Nia dehan.

Hatan ba preokupasaun Bankada FRETILIN nian ne’e, Vise-Ministru Asuntu Parlamentár Adérito da Costa Hugo hateten, Governu mak iha direitu eskluzivu bá negosiasaun tratadu fronteira ne’ebé husik Governu halo nian servisu, no lalika julga tanba ne’e estadu ho estadu.

“Servisu tékniku sira la’o hela dezde uluk, agora Governu kontinua tanba atu halo negosiasaun mak Governu nian kompeténsia konstituisaun ne’e fó bá Governu la’ós fó bá akadémiku ka Patidu Polítiku no ativista sira mak halo negosiasaun,” Adérito da Costa Hugo afirma .

Jornalista Estajiária : Zita Menezes