Hatutan.com, (07 Marsu 2025), Díli–Grupu Mulheres Parlementares Timor-Leste (GMPTL) kompromete halo advokásia no protejé feto no labarik feto sira-nia direitu iha Timor-Leste.

Lee Mós: Rede Advokasia Direitu Feto Kondena Violénsia Hasoru Feto no Labarik-Feto

GMPTL selebra loron internasionál feto, Sesta (07/03/2025). Foto/Zita Menezes

Prezidenti GMPTL,  Aliança da Conceicão Araújo hateten, ónra ida bá GMPTL hodi komemora loron internasionál feto nian  ho tema “feto no labarik feto nian direitu igualdade no empoderamentu” hodi fó omenajen bá feto maluk Timoroan sira ne’ebé sakrifiká sira -ia aan iha luta bá indepedénsia.

La haluha mós GMPTL fó omenajen bá feto maluk internasionál sira ne’ebé mate iha país sira ne’ebé hasoru konflitu hanesan iha Miamar, Ukraina no Palestina .

“Komemorasaun  loron feto internasionál ida-ne’e konvida fali ita hotu reflete situsaun ne’ebé liu ona no dezafiu ne’ebé mak feto kontínua enfrenta iha realidade moris nian, iha biban ida-ne’e Parlamentu Nasionál liuhosi GMPTL hakarak reafirma kompromisiu hodi halo advokásia hodi promové no proteje feto no labarik feto sira nian direitu liuhosi lejislasaun ne’ebé vigora iha Timor-Leste ne’ebé iguál, justu no segura,” Deputada Aliança da Conceicão Araújo iha nia diskursu iha ámbitu komemorasaun loron feto ne’ebé hala’o iha iha Delta Nova, Sesta (07/03/2025).

GMPTL mós sei kontinua halo fiskalizasaun bá implementasaun politiká no implementasaun bá programa  Governu liuliu iha ambitu protesaun sosiál bá grupu feto labarik ema ho difisiénsia no grupu vulneravél sira seluk.

Iha fatin hanesan Primeiru-Ministru Kay Rala Xanana Gusmão iha nia diskursu hanteten, feto nu’udár personajen  no rekursu xave ida ne’ebé importante tebes hahú husi familia ida, iha sosiedade nian laran, iha Timor-Leste feto nian luta kontra diskriminasaun iha luta bá direitu feto nian hahu kedan husi bei-ala sira to’o ukun rasik aan.

“Sei kontinua nafatin to’o iha implementasaun bá iguladade jeñeru, ho ida-ne’e, ha’u nia hakruuk atu onra bá sira ne’ebé mak hatudu aten brani espiritu lutadór iha prosesu luta bá indepedénsia bá rai doben ida-ne’e,” Xefe Governu  hateten.

PM Xanana hateten, selebrasaun ida-ne’e importante tebes atu ema hotu refleta kona-bá papél feto nian iha sira nian misaun no riskú sofriedade hodi kontribiui bá dezemvolvimentu ne’ebé sustentavél liuliu iha area hanesan Edukasaun Saúde Justisa Politiká Ekonómia lideransa no selu-seluk tán.

Iha fatin hanesan Prezidenti Parlamentu Nasionál (PPN) Maria Fernanda Lay foka liubá feto iha família tanba bainhira inan-aman konsidera nian oan feto ne’e demokrásia moris, bainhira nian laen konsidera nian feen iha liberdade para bele servisu bele tama iha poltiká ida-ne’e mós demokrásia.

“Ida-ne’e mak ita hakarak no demokrásia tenki moris husi familia no uma laran liliu respeita malu, tanba respeita ne’e importante no reflete iha sosiédade edukasaun no familia ida-idak nian,” Maria Fernanda Lay hateten.

Jornalista Estájiaria: Zita Menezes